Բաքվում շարունակվում է Վագիֆ Խաչատրյանի գործով «դատական նիստը»
Բաքվում շարունակվում է այս տարվա ամռանը Լաչինի միջանցքում Ադրբեջանի սահմանապահ ծառայության կողմից առևանգված արցախցի բնակիչ Վագիֆ Խաչատրյանի գործով «դատական նիստը»։ Այս մասին տեղեկանում ենք ադրբեջանական ԱՊԱ գործակալությունից։
Նշվում է, որ դատական քննությունը կավարտվի այսօր, որից հետո դատախազը մեղադրյալի նկատմամբ պատիժ կպահանջի։
Հիշեցնենք, որ նախորդ նիստը նոյեմբերի 1-ին էր։
Հիշեցնենք, որ արցախցի 68-ամյա Վագիֆ Խաչատրյանն առևանգվել է հուլիսի 29-ին Լաչինի միջանցքում և տեղափոխվել Բաքու, երբ փորձել է Կարմիր խաչի միջազգային կոմիտեի ուղեկցությամբ Հայաստան տեղափոխվել բուժման նպատակով։
Ադրբեջանում Վագիֆ Խաչատրյանին մեղադրանք են առաջադրել քրեական օրենսգրքի երկու հոդվածների հատկանիշներով՝ ցեղասպանություն ու բռնի տեղահանում։ Բաքուն նրան մեղադրում է 1991 թվականի դեկտեմբերի 22-ին Մեշալի գյուղում «ցեղասպանության» իրականացման համար։ Շինծու գործով 59 «տուժող» են գտել, որոնք իբր ճանաչել են Վագիֆ Խաչատրյանին։
Վագիֆ Խաչատրյանը Բաքվի դատարանում հայտարարել է՝ չի ընդունում մեղադրանքը, չի մասնակցել ադրբեջանցիների նկատմամբ որևէ հանցագործության։
