Ֆրանսիայի Սենատի նախագահի համոզմամբ՝ Ադրբեջանում պահվող հայ ռազմագերիները պետք է վերադարձվեն
Ֆրանսիայի Սենատի նախագահ Ժերար Լարշեն կարևոր քայլ համարեց Ադրբեջանում պահվող հայ ռազմագերիների հարցի քննարկումը ԵԽԽՎ-ում, ինչպես նաև՝ ԵԽԽՎ Մոնիտորինգի կոմիտեի կողմից դրա հետ կապված համապատասխան հայտարարության ընդունումը: ՀՀ նախագահական նստավայրում պարգևատրման արարողությունից հետո լրագրողների հետ ճեպազրույցում Ֆրանսիայի Սենատի նախագահը նշեց, որ դա կարող է միջազգային ճնշում լինել Ադրբեջանի վրա: Նրա խոսքով՝ Ադրբեջանը միջազգային պայմանագրերի, զինադադարի եռակողմ հայտարարության համաձայն պետք է վերադարձնի և՛ ռազմագերիներին, և՛ աճյունները:
«Այս շաբաթ ԵԽԽՎ-ն քննարկումներ անցկացրեց ռազմագերիների հետ կապված, Եվրոպայի ժողովրդական կուսակցության խոսնակը, որը մեր Սենատի անդամ է, սոցիալական հարցերի գծով փոխնախագահ է, հիշեցրեց, թե ինչպիսի պահանջներ են ներկայացնում միջազգային կոնվենցիաները և զինադադարի մասին հայտարարությունը: Ես դա կարևոր քայլ եմ համարում»,- «Արմենպրես»-ի հաղորդմամբ՝ ասաց Սենատի նախագահը:
Անդրադառնալով այն հարցին, որ Թուրքիան ներգրավվածություն է ունեցել Արցախի 44-օրյա պատերազմում՝ տարածաշրջան բերելով վարձկանների, ինչի մասին խոսել է նաև Ֆրանսիայի նախագահը, Սենատի նախագահը նշեց, որ Թուրքիայի որոշ արարքներ եվրոպական արժեհամակարգից դուրս են:
«Ես խոսում եմ որպես նախկինում Ֆրանսիա-Թուրքիա բարեկամական խմբի նախագահ: Ուզում եմ ասել, սիրելի բարեկամներ, ձեր արածներից շատ բաներ մեր արժեհամակարգից դուրս են: Եվրոպական խորհուրդն առաջիկայում որոշումներ պետք է կայացնի, եթե Թուրքիան շարունակում է որոշակի արժեքներ ոտնահարել»,-հավելեց Սենատի նախագահը: