Օտարերկրյա պաշտոնյաները «Հայաստանի դիրքորոշում» կոչվածը բավ է շահարկեն
Հռետորական հարց՝ լռության ուխտ ընդունած կամ գրեթե առօրյա ռեժիմով գործող բոլոր ընդդիմադիր ինստիտուցիոնալ ուժերին. «Տավուշից տարածքներ զիջելը առնվազն նշանակում է՝ ա) ռազմավարական ամենազորեղ դիրքերի զիջում, բ) դեռևս 1988 թ. հունվարի 12-ին հաստատված արձանագրությամբ Հայկ. ԽՍՀ֊ի կազմում ճանաչված տարածքների հանձնում և գ) ՌԴ֊ի հետ միջպետական ճանապարհի և գազի մատակարարման խափանում՝ դրանով թելադրված ոչ միայն զուտ տնտեսական, այլև քաղաքական հետևանքներով հանդերձ։ Գուցե կարևոր չեք համարո՞ւմ, որ շրջանցվում են այսպիսի առանցքային որոշումներ կայացնելու սահմանադրական հիմքերը, կամ ևս համոզված եք, որ դրանով պետական խաղաղ սահմաններ ենք ունենում, բացատրեք, մենք ևս գուցե ընդունենք։ Իշխանությունների դիրքորոշումը՝ կոնկրետ գործողություններով ուղեկցվող, ամենօրյա ռեժիմով լսում ենք ու տեսնում»։
Հ.Գ. Չեմ մտնում դետալների մեջ, բայց գոնե քննարկեք և անհապաղ դիմեք բոլոր այն իրավասու ազգային ու միջազգային կառույցներին, որպեսզի առնվազն չխաթարվեն վավերացման ենթակա միջազգային պայմանագրերով կարգավորման ենթակա հարցերի լուծման սահմանադրական հիմքերը, էլ չեմ խոսում հանրաքվեի մասին, ինչը իսպառ մոռացել ենք։ Օտարերկրյա պաշտոնյաները «Հայաստանի դիրքորոշում» կոչվածը բավ է շահարկեն, բոլորը պետք է ըմբռնեն մի պարզ ճշմարտություն՝ այդ կարևոր հասկացության աղբյուրը ժողովուրդն է ու իր խորհրդարանը՝ անկախ որակից։ Եթե դա չեն ըմբռնում կամ իրենց չիմացողի տեղ են դնում, ուրեմն դուք անելիք ունեք…
Իրավաբանական գիտությունների դոկտոր
