Չորս զոհ և 1 վիրավոր ունենք, նախ, Նիկոլի և նրա ոհմակի հանցավոր քաղաքականության հետևանքով, և ապա նոր միայն՝ Ադրբեջանի ԶՈւ կրակի. 2
Սկիզբը` այստեղ
Նիկոլի դրածո, Հայաստանի պաշտպանության նախարարի պաշտոնը զբաղեցնող Սուրեն Պապիկյանն ապիկար է, եթե իր ղեկավարած «պաշտպանության նախարարություն» կոչված «կանտորայում» «բարդակ» է, ինքն իրավիճակին չի տիրապետում:
Իսկ եթե տիրապետում է, եթե վերոնշյալ «կանտորայի» կողմից երեկ իր գիտությամբ կամ հանձնարարությամբ, միտումնավոր կերպով կեղծ, հակասական ու խայտառակ տեղեկատվություն է հրապարակվել, ապա Պապիկյանը «պաշտպանության նախարարություն» կոչվածի հեղինակության, ինչպես նաև, Նիկոլի պես, Հայաստանի ազգային անվտանգության ու միջազգային հեղինակության դեմ գործող, նախարարության և պետության հեղինակությունը վնասած հայադավ սրիկա է՝ ենթակա քրեական պատասխանատվության:
Փաստերի անողոք լեզվով
Ինչ է կատարվել իրականում. Սյունիքի մարզի Կապան համայնքի Ներքին Հանդի հատվածում տեղակայված հայկական դիրքից հայ զինծառայողներից մեկը (ամենայն հավանականությամբ, ԵԿՄ կամավորական) փետրվարի 12- ի երեկոյան ինքնաձիգից կրակել է ադրբեջանական դիրքերի ուղղությամբ և, ըստ ադրբեջանական կողմի, վիրավորել իրենց զինծառայողներից մեկին: Դրանից հետո, Ադրբեջանի պետական սահմանային ծառայության հաղորդագրության համաձայն, գիշերն իրականացվել է «Հատուցում» գործողությունը, ինչի հետևանքով, ինչպես արդեն հայտնի է, հայկական կողմը 4 զոհ, մեկ վիրավոր ունի:
Ինչի՞ հետևանքն է այն, որ մեր զինծառայողի կրակոցին հաջորդած, շուրջ 4 ժամ տևած (5:30- ից մինչև 9:30- ը) թշնամու կրակոցների ընթացքում ադրբեջանական կողմը զոհեր, վիրավորներ չունի, իսկ մենք չորս զոհ ու մեկ վիրավոր ունենք: Այս ողբերգական ու խայտառակ իրողությունը պայմանավորված է նրանով, որ ադրբեջանական կողմի կրակոցների ընթացքում մեր զինծառայողներին հրամանատարության կողմից քրեական պատասխանատվության սպառնալիքով խիստ հրաման է տրվել՝ չկրակե՛լ:
Այսպիսով զինծառայողներին ստիպվել է չկատարել իրենց պարտականությունը՝ չնայած նրան, որ վերադաս հրամանատարության կողմից գրավոր հրամաններով հստակ սահմանված են այն դեպքերը, երբ զինծառայողը, իրադրությունը գնահատելով, կարող է և կամ պարտավոր է կրակ բացելու որոշում կայացնել:
Շատ հնարավոր է, որ եթե կրակեին, պաշտպանվեին, հուժկու պատասխան տային թշնամուն, զոհեր չունենայինք կամ թշնամու գնդակներից խոցվածները հինգը չլինեին, այսինքն՝ տեսնելով, որ ինքն էլ զոհեր, վիրավորներ է ունենում, թշնամին ստիպված դադարեցներ կրակը: Բայց հրամանատարը կամ հրամանատարները հո առյուծի կաթ չէի՞ն խմել, որ չնայած Ալիևի հայտարարություններին և Ադրբեջանի գործողություններին, խաղաղության ճանապարհով գնալու, «խաղաղության պայմանագրի» և «Խաղաղության խաչմերուկ»- ի մասին բարբաջող Նիկոլի ու նրա ոհմակի կամքին դեմ գնային ու կրակելու հրաման տային: Գիտեի՞ն, չէ՞, որ խստորեն պատժվելու են…
Հայաստանի «պաշտպանության նախարարություն» կոչվածն իր պաշտոնական կայքում փետրվարի 13- ին, ժամը 09:14- ին «Ադրբեջանի պաշտպանության նախարարությունն ապատեղեկատվություն է տարածել» վերտառության ներքո հրապարակեց հետևյալ տեղեկատվությունը .
«Ադրբեջանի պաշտպանության նախարարության հաղորդագրությունը, թե փետրվարի 12-ին՝ ժամը 20։50-23:40 ընկած ժամանակահատվածում, Հայաստանի Հանրապետության ԶՈՒ ստորաբաժանումներն իբր կրակ են բացել սահմանագոտու հյուսիսարևելյան հատվածում տեղակայված ադրբեջանական դիրքերի ուղղությամբ, չի համապատասխանում իրականությանը»:
Պապիկյանի ղեկավարած «կանտորան» այսպիսով փաստորեն ստել է, բայց վարվել է այնպես, ինչպես նախկինում բազմիցս վարվել է Ադրբեջանի պաշտպանության նախարարությունը, որը կամ իրականությանը չհամապատասխանող է ներկայացրել հայկական դիրքերի ուղղությամբ իրենց կողմից արձակված կրակոցների, մեր զինծառայողին վիրավորում պատճառելու վերաբերյալ Հայաստանի ՊՆ- ի հաղորդագրությունը, կամ այնպես է ներկայացրել, թե առաջինը մերոնք են կրակել, և իրենք ընդամենը պատասխանել են:
Թերևս ավելորդ է ասել, որ թշնամու հետ հարաբերություններում սուտն արդարացված է, եթե կարող ես այդ ստի տակից դուրս գալ, այսինքն՝ թշնամին կամ ինչ- որ երրորդ կողմ, ինչպես, օրինակ, Եվրամիության դիտորդները չեն կարող ապացուցել, մերկացնել քեզ, որ ստում ես, մեղադրել ստախոսության մեջ:
Եթե Հայաստանի «պաշտպանության նախարարություն» կոչվածում վստահ չէին, որ կարող են պնդել իրենց սուտը, և թշնամին կամ երրորդ կողմն այն մերկացնող ապացույց չի կարող ներկայացնել, ապա կատարվածը պետք է գոնե ներկայացնեին որպես պատասխան ադրբեջանական կողմից արձակված կրակոցների, իսկ եթե վստահ չէին, որ Ադրբեջանը կամ երրորդ կողմն ապացույցով չի կարող հերքել նաև դա, ապա չպետք է փորձեին իրականությունը թաքցնել, պետք է ճշմարտությունը ներկայացնեին ու հիմնավորեին, բացատրեին հայ զինվորի կրակելու իրավունքը: Իրավունք, որ նա ուներ, ինչն առաջիկայում կհիմնավորենք:
«Պաշտպանության նախարարություն» կոչվածը խայտառակ կերպով հերքեց ինքն իրեն
«Պաշտպանության նախարարություն» կոչվածի ժամը 09:14- ի հողորդագրությունից ժամեր հետո, արդեն երեկոյան նախարարության ֆեյսբուքյան էջում Հայաստանի ՊՆ ռազմական ոստիկանության (նախարարության կառուցվածքային ստորաբաժանում) կողմից հրապարակվեց վերոնշյալ հաղորդագրությունն ըստ էության հերքող մի խայտառակ հաղորդագրություն , ընդ որում, դա անփութորեն ներկայացնելով մեկ օր առաջվա՝ փետրվարի 12- ի ամսաթվով, երբ դեռ ոչ հայկական կողմից էր կրակոց եղել, ոչ էլ ադրբեջանական: Ռազմական ոստիկանության հաղորդագրության մեջ մասնավորապես նշված է.
«Ադրբեջանական լրատվամիջոցների տարածած տեղեկատվությունը Հայաստան-Ադրբեջան պետական սահմանի Կապան-Զանգելան հատվածում ս/թ փետրվարի 12-ին հայաստանցի դիրքապահների կողմից կրակ բացելու մասին հետաքննվում է: Վերադաս հրամանատարության կողմից գրավոր հրամաններով հստակ սահմանված են այն դեպքերը, երբ զինծառայողը, իրադրությունը գնահատելով, կարող է եւ/կամ պարտավոր է կրակ բացելու որոշում կայացնել: Նախնական տեղեկատվությամբ փետրվարի 12-ին տվյալ տեղամասում նման իրադրություն առկա չի եղել: Այս հանգամանքը հաստատվելու պարագայում հրամանը խախտելու դեպքի մեղավորները կենթարկվեն պատասխանատվության»:
Այսինքն՝ առաջինն իսկապես հայ դիրքապահը կամ դիրքապահներն են կրակ բացել, քանի որ ռազմական ոստիկանությունը չի հերքել ադրբեջանական ԶԼՄ- ների տարածած տեղեկատվությունը, այլ հայտնել է այն հետաքննելու մասին, ինչպես նաև խոստացել պատասխանատվության ենթարկել դիրքապահներին, եթե պարզվի, որ փետրվարի 12-ին տվյալ տեղամասում կրակելու հիմք հանիսացող իրադրություն առկա չի եղել ու նրանք խախտել են կրակելու իրավունք տվող ու պարտականություն սահմանող դեպքերի վերաբերյալ վերադասի գրավոր հրամանը:
Կրակելու հիմք հանիսացող իրադրություն առկա չի՞ եղել… Այն, որ թշնամու զորքը Հայաստանի ինքնիշխան տարածքը 2022թ. սեպտեմբերի 12-ից բռնազավթել ու դեռ մինչև հիմա գտնվում է այնտեղ, կրակելու հիմք հանդիսացող իրադրություն չէ՞… Հավելենք, որ թշնամին ԵԿՄ- ի կամավորներից 4- ի կյանքը խլած, մեկին էլ վիրավորած գնդակներն արձակել է ոչ թե Ադրբեջանի, այլ Հայաստանի հենց նույն բռնազավթած տարածքից: Եվ հիմա Նիկոլի ռազմական ոստիկանությունը հայ դիրքապահին կամ դիրքապահներին է ուզում քրեական պատասխանատվության ենթարկել, եթե պարզվի…
Ավելին. հասկանո՞ւմ եք, որ նախարարության այս հակասական ու խայտառակ հաղորդագրություններից հետո թե Հայաստանում, թե Հայաստանից դուրս հետագա հաղորդագրությունների հավաստիությանը հավատացողները կարող է չափազանց քիչ լինեն: Եվ պատկերացնո՞ւմ եք դրա հետևանքները…
Արթուր Հովհաննիսյան
