Վագիֆ Խաչատրյանի գործով դատական նիստը հոկտեմբերի 13-ին տեղի կունենա

Հոկտեմբերի 13-ին տեղի կունենա Լաչինի միջանցքից առևանգված Վագիֆ Խաչատրյանի գործով դատական նիստը։

Ըստ մամուլի՝ քրեական գործը քննվելու է Բաքվի զինվորական դատարանում՝ դատավոր Ջամալ Ռամազանովի կողմից։ Գործով տուժող է ճանաչվել 59 անձ։

Հիշեցնենք, որ հուլիսի 29-ին Ադրբեջանի սահմանապահ ծառայության ներկայացուցիչները Բերձորի միջանցքում ապօրինի տեղակայված ադրբեջանական «անցակետից» առևանգել են վիրահատության նպատակով Կարմիր Խաչի միջազգային կոմիտեի միջոցով Արցախից Հայաստան տեղափոխվող 68-ամյա Վագիֆ Խաչատրյանին։

Ադրբեջանի գլխավոր դատախազությունը հայտարարել է, թե «նրան մեղադրանք է առաջադրվել» դեռ 2013-ին, նրան կալանավորելու որոշում է կայացվել, և որ նույն թվականին «միջազգային հետախուզում է հայտարարվել»։

Արցախցուն Բաքուն մեղադրում է «ցեղասպանության, ադրբեջանցիների տեղահանության մեջ»։

Վագիֆ Խաչատրյանը Բաքվից նամակ էր ուղարկել ընտանիքին, գրել էր․ «Ձեր մասին եմ մտածում, դեռ ողջ եմ, լավ մնացեք»։