Ճապոնացի կույր դաշնակահար Նոբուի մենահամերգը Երևանում
«Նոբուն ոչ միայն մեծագույն երաժիշտ ու աստղ է, այլև վառ ապացույցը նրա, որ մարդկային հնարավորությունները գրեթե սահմաններ չունեն»:
Վալերի Գերգիև
«Երևանյան հեռանկարներ» 24-րդ միջազգային երաժշտական փառատոնը մեկնարկում է իր աշնանային համերգաշարն աշխարհահռչակ վիրտուոզ դաշնակահար Նոբույուկի Ցուջիի երկար սպասված մենահամերգով։
Համերգը տեղի կունենա սեպտեմբերի 11-ին՝ ժամը 19:00-ին Արամ Խաչատրյան համերգասրահում:
Ծրագրում կհնչեն՝ Լյուդվիգ վան Բեթհովեն, Ֆերենց Լիստ, Մորիս Ռավել և Նիկոլայ Կապուստին։
Ճապոնացի դաշնակահար Նոբույուկի Ցուջին՝ Նոբուն ի ծնե կույր է, նվագել սկսել է երկու տարեկանից: 2009-ին ստացել է Վան Քլայբըրնի միջազգային մրցույթի ոսկե մեդալը, ինչին հետևել է դաշնակահարի լայն ճանաչումը ողջ աշխարհում` բացառիկ վիրտուոզության և նրա կատարումներում առկա հուզմունքայնություն համար:
Նոբուն հանդես է եկել առաջատար Բի-Բի-Սի, Լա Սկալա, Մյունխենի, Ճապոնիայի ֆիլհարմոնիկ նվագախմբերի, Լոնդոնի Ֆիլհարմոնիա նվագախմբի, Ճապոնիայի, Յոմիուրի Նիպպոն, Տոկիոյի, Սիեթլի և Բալթիմորի, Բազելի, Մարիինյան սիմֆոնիկ նվագախմբերի հետ։ Նա համագործակցել է աշխարհահռչակ դիրիժորների հետ, որոնց թվում են Վալերի Գերգիևը, Վլադիմիր Աշքենազին, Վլադիմիր Սպիվակովը, Խուանխո Մենան, Վասիլի Պետրենկոն և այլք։
Մենահամերգներով Նոբուն ելույթ է ունեցել Հյուսիսային Ամերիկայի և Եվրոպայի ամենահեղինակավոր համերգասրահներում՝ այդ թվում Նյու Յորքի Քարնեգի, Փարիզի Շանզ Էլիզե համերգասրահներ, Լոնդոնի Ալբերտ թագավորական սրահ, Բեռլինի Ֆիլհարմոնիա և Վիեննայի Մուզիքֆերայն։
Նոբույուկի Ցուջին «Avex Classics International» ընկերության բացառիկ իրավունքով ձայնագվող արտիստ է:
Նոբուի՝ Քարնեգի համերգասրահի 2011-ի մենահամերգի տեսագրությունն արժանացել է Գրամոֆոնի «Ամսվա ձայնագրություն» մրցանակին։ Նույն մրցանակին է արժանացել նաև երաժշտի վերջին տեսագրությունը՝ «Հպվելով հնչյունին․ Նոբույուկի Ցուջիի անհնարին շրջագայությունը» վավերագրական ֆիլմը՝ նկարահանված Փիթեր Ռոսենի կողմից։
