Եկել է ժամանակը, երբ Ռուսաստանի պատերազմը պետք է և կարող է կանգնեցվել. Զելենսկին դիմել է G20-ի առաջնորդներին
Ուկրաինայի նախագահ Վլադիմիր Զելենսկին դիմել է G20-ի առաջնորդներին, որոնց գագաթաժողովը տեղի է ունենում Ինդոնեզիայում։
Եկել է ժամանակը, երբ ՌԴ-ի պատերազմն Ուկրաինայի դեմ կարելի է կանգնեցնել, ասել է Ուկրաինայի նախագահը «Մեծ քսանյակի» առաջնորդներին հղած իր տեսաուղերձում, գրել է The Guardian-ը։
«Մենք թույլ չենք տա Ռուսաստանին սպասել և հավաքել ուժերը… Ես համոզված եմ, որ հիմա եկել է ժամանակը, երբ Ռուսաստանի պատերազմը պետք է և կարող է կանգնեցվել»,- ասել է Ուկրաինայի նախագահը։
Զելենսկին ընդգծել է, որ ՌԴ-ն պատերազմն ավարտելու համար պետք է դուրս բերի իր օկուպացիոն զորքերը, փոխհատուցում վճարի ուկրաինական պետությանը հասցրած վնասների համար և հաստատի այդ երկրի տարածքային ամբողջականությունը։
Նախագահը նաև կոչ է արել միջազգային համաժողով հրավիրել՝ «անվտանգության հետպատերազմյան ճարտարապետության կարևոր տարրի ամրապնդման» և Ռուսաստանի կողմից ագրեսիայի կրկնությունը կանխելու համար։
Հիշեցնենք, որ «Մեծ քսանյակի» գագաթաժողովը տեղի է ունենում ինդոնեզական Բալի կղզում, միջոցառումն սկսվել է նոյեմբերի 15-ին և պետք է ավարտվի նոյեմբերի 16-ին։ ՌԴ նախագահ Վլադիմիր Պուտինը գագաթաժողովին չի մեկնել։ Գագաթաժողովին մասնակցելու է Ռուսաստանի արտաքին գործերի նախարար Սերգեյ Լավրովը։
