Հայաստանի «փրկության» ԼՏՊ-նիկոլական ծրագիրը վտանգի տակ է
Հայաստանի առաջին նախագահ Լևոն Տեր-Պետրոսյանը 26.09.2022թ. հարցազրույցի ժամանակ հետաքրքիր բացահայտում կատարեց:
- Հերթական անգամ ապացուցվում է, որ Լևոն Տեր-Պետրոսյանն է կանգնած Նիկոլ Փաշինյանի ծրագրի ակունքում:
Ըստ 2015թ. Լևոն Տեր-Պետրոսյանի ելույթի (01.03.2015թ.) առանց հայ-թուրքական հարաբերությունների կարգավորման, տարածաշրջանում տնտեսական զարգացման և անվտանգ գոյության հեռանկար չկա: Այս գիծը փայլուն կերպով առաջ է տանում Նիկոլ Փաշինյանը:
Նույն օրվա ելույթում Լևոն Տեր-Պետրոսյանը (ԼՏՊ) հեռավոր 2015 թվականից մի ոտանավոր է արտասանել կոչելով այն ընդդիմության կոդավորված ստրատեգիական պլան և համարելով այն Բեռլինի գրավումից ավելի հանճարեղ պլան: (ելույթի տեսանյութը և տեքստն այս հղումով՝ https://www.youtube.com/watch?v=iwjZlHqogFA)
Ու ի զարմանս մեզ այդ պլանն իրականացավ: Քաղաքացիական պայմանագիր կուսակցության (որի ստեղծման գործընթացը սկսվել է 2015թ-ի մայիսի 30-ին կայացած հիմնադիր համաժողովով) անդամները 2018թ. ապրիլ-մայիսին այդ «հանճարեղ» պլանն իրագործեցին և նշեցին Առաջին Հանրապետության 100 ամյակը (28.05.2018թ. Սարդարապատում)՝ առանց ռեժիմի:
Հատկանշական է, որ Լևոն Տեր-Պետրոսյանն այդ «մարգարեությամբ» Նիկոլ Փաշինյանի թիմին առնվազն 2 հատկանիշ է վերագրում՝
1) հակառուս (ըստ ոտանավորի՝ Պուտինի հրաժարականի պահանջը կրծքի տակ).
2) գլոբալիստ (բաբելոնյան աշտարակի նոր շինարար):
Նիկոլ Փաշինյանի թիմն այս 4 տարիների ընթացքում բազմակի անգամ ապացուցել է իր վերոգրյալ հատկանիշները՝ թիրախավորել է գլոբալիզմի խոչընդոտ համարվող ազգային հիմնական ինստիտուտները՝ եկեղեցին, բանակը, ընտանիքը, ինչպես նաև արժեքային համակարգը, և ամեն ինչ «տակից» արել է հայ-ռուսական հարաբերությունները փչացնելու համար:
Եթե ինձ կմեղադրեք դավադրության տեսությանը հետևելու հարցում, ապա խնդրում եմ բացատրեք, թե ԼՏՊ-ն իր պատկառելի տարիքով, կարգավիճակով ու գիտակցությամբ ինչու՞ է նման «մարգարեական» ոտանավոր արտասանում:
- Ինչու՞ է Լևոն Տեր-Պետրոսյանն ակտիվացել:
ԼՏՊ-ն 26.09.2022թ. հարցազրույցի ժամանակ մի քանի բացահայտում արեց՝
1) Միևնույն է վատ է լինելու, պետք է օգնել Նիկոլ Փաշինյանին ավելի մեղմ վատն ընտրի.
2) Նիկոլ Փաշինյանը վախենում է այդ նոր փաստաթուղթը ստորագրելուց.
3) Լևոն Տեր-Պետրոսյանը ստանձնում է նոր ծրագրի պատասխանատվությունը և փորձում է մյուսներին էլ ներգրավել:
Նույն հարցազրույցի ժամանակ ԼՏՊ-ն մի քանի հակասական մտքեր ներկայացրեց՝
1) ասեց չգիտեմ Նիկոլ Փաշինյանի և գերտերությունների ղեկավարների հետ ինչ պայմանավորվածություններ կա, բայց արդեն խնդրի լուծման տարբերակ ուներ, նշելով, որ պետք է ընտրել ամենամեղմ վատը.
2) այն հարցին, թե ստորագրելուց հետո, եթե ադրբեջանական կողմը շարունակի ավելին պահանջել, ԼՏՊ-ն փորձեց անլրջացնել հարցը, այն դեպքում, երբ եռակողմ 09.11.2020թ. ստորագրած փաստաթուղթը բազմիցս կոպիտ կերպով ադրբեջանական կողմը խախտել և խախտում է.
3) նշեց, թե ինչպես կարող են վստահել Նիկոլ Փաշինյանին, եթե նա մի բան պատմի, բայց պարզվի, որ դա իր տպավորությունն էր և ոչ թե իրական միտքը, այն դեպքում, երբ ինքն առաջարկում է այդ նույն անվստահելի մարդու հետ գործակցելով խնդիրը լուծել:
ՀԵՏԵՎՈՒԹՅՈՒՆ. Հայաստանի «փրկության» ԼՏՊ-նիկոլական ծրագիրը վտանգի տակ է:
14.09.2022թ. ինքնաբուխ հանրահավաքը, որն արտահայտում էր հանրության արդարացի զայրույթը և ժողովրդի արթնացման ազդանշան էր, շատերի ծրագրերը խառնել է: Նիկոլ Փաշինյանը զգուշանում է, իսկ Լևոն Տեր-Պետրոսյանը փորձում է անձամբ առաջ տանել ծրագիրը:
Հ.Գ. Հանձնվելու դեպքում, այսպես, թե այնպես պարտված ես՝ առանց գոյատևման երաշխիքի: Պայքարելու դեպքում, ՈՒՆԵՍ հաղթելու հնարավորություն:
Արա Զոհրաբյան
