Ես` Խելագարս
Ես` Խելագարս
Այսօր երազ տեսա, որ ես հյուր եմ գնում
Լուսահոգի դարձած ապ-ու-պապիս,
Խոնարհ կանգնում եմ ես արմատներիս առջև
Եվ լռությամբ սպասում դատաստանին:
Նստած են պապերս ամպերի մեջ լռին,
Ես լոկ պապիս գիտեմ, ում որ ես եմ տեսել,
Ու բոլորը լռին ունկնդիր են պապիս
Եվ ուզում են ինձնից պատասխանը լսել:
Եւ խոսում է պապս իր ձևերի մեջ հանդարտ,
Ինչպես խոսում էր միշտ կենդանության օրոք,
Հայացքը խոժոռ է ու խոսքերն են հատու,
Ամեն ասված բառը չոր է ու անողոք:
-Ինչո՞ւ եկար, ասա՛, դու այսքան վաղօրոք
Էլ գործ չունե՞ս այնտեղ դու անելու
Պատգամներս բոլոր դու թողել ես կիսատ
Քո փոխարեն ո՞վ է երկրում բանելու:
-Գործդ կիսատ մնաց, արտերը չես վարել
Ցանածներդ կիսատ, չունես անգամ հնձվոր
Մինչև բերքդ չառնես ու չտեղավորես,
Իմացիր, որ ինքդ-ինքդ ես մեղավոր:
Պապս խոսեց հանդարտ, հանդարտ, խորհրդավոր,
Հետո ժպտաց բարի-բարի իր ժպիտով
Ու պատգամեց նորից վերադառնալ երկիր
Եվ կատարել կիսատ աշխատանքը հերթով:
Ես վեր թռա քնից` ամոթով մեղավոր,
Պապերիս պատգամը իմ ուղեղում դաջված
Ու հասկացա կյանքում այնքան գործ կա կիսատ,
Իսկ ես` խելագարս,մնացել եմ քնած:
Աշոտ Մինասյան Մ․Ա․Հ․
09.02.2015թ.
Աշոտ Մինասյանի ֆեյսբուքյան էջից