Հունաստանում հրդեհի ալիքները մոտեցել են Օլիմպիական խաղերի «ծննդավայրին». The Guardian
Հունական Էվիա կղզում մոլեգնող անտառային հրդեհի ճարակ է դարձել առնվազն 150 տուն: Կրակը շրջապատել է վանքն ու տասնյակ գյուղեր, գրում է The Guardian-ը` մանրամասնելով, որ Սուրբ Դավիթ վանքի երեք վանականներ հրաժարվել են լքել վանքը, սակայն մոտակա գյուղերից բոլորը տարհանվել են:
«Մենք շնչահեղձ ենք լինում ծխի պատճառով»,- պատմել է վանականներից մեկը՝ նկարագրելով վանքը շրջապատող 30-40 մետր բարձրությամբ բոցերը:
Ոստիկանությունը հայտնել է, որ վանականներին կստիպի տարհանվել, եթե նրանց կյանքին վտանգ սպառնա: Լողափում հավաքված շուրջ 85 մարդ տարհանվել է հինգ նավակով:
Աղբյուրը գրում է, որ սա մեկն է մոտ հարյուր անտառային հրդեհներից, որոնք այս օրերին պատուհասել են Հունաստանը:
Հինգշաբթի առավոտյան հրշեջները շարունակել են մարել Աթենքի մերձակայքում բռնկված հրդեհը, մինչդեռ Օլիմպիական խաղերի ծննդավայր Օլիմպիայի քաղաքապետը օգնություն է խնդրել, քանի որ կրակը սպառնում է այդ վայրին: Օլիմպիայում մոտ 100 հրշեջ պայքարում է կրակի դեմ, նրանց օգնում են երեք ուղղաթիռ և երկու ինքնաթիռ:
Հրդեհները բռնկվել են, քանի որ Հունաստանը գտնվում է շոգ ալիքի ճիրաններում: Փորձագետները նախազգուշացրել են, որ գլոբալ տաքացումը մեծացնում է նման հրդեհների հաճախակիությունը և ուժգնությունը:
«Արվել է հնարավորը՝ փրկելու համար թանգարանն ու հնագիտական վայրը, որտեղից սկսվել են Օլիմպիական խաղերը», – ասել է մշակույթի նախարար Լինա Մենդոնին: