Կյանքից անժամանակ հեռացել է արցախցի լրագրող, բանաստեղծ Կարեն Շիրինյանը

Դժբախտ պատահարի հետևանքով կյանքից անժամանակ հեռացել է արցախցի լրագրող, բանաստեղծ Կարեն Շիրինյանը։ Այս մասին տեղեկանում ենք «Նորություններ Արցախից» ֆեյսբուքյան էջից։

«Կարենը ձեթի արտադրամասում ընկել է հոսքագծի մեջ։ Երկու օր կոմայի մեջ է եղել: Այդպես էլ գիտակցության չգալով մահացել է։ Հուղարկավորությունը տեղի է ունենալու ՌԴ Կրասնոդար քաղաքում։

Չենք հավատում ու չենք համակերպվում այս դաժան իրականությանը»,-նշված է էջում։

Կարենի վերջին բանաստեղծությունը՝ իր էջում հրապարակված

Երկու ուղիներ խաչվեցին իրար,

Երկու կիսատ սիրտ մեկ դարձան մի օր,

Երկու ճրագներ վառվեցին հանկարծ

Ու մեկ դարձավ տիեզերքը նոր:

Նոր աշխարհ բացվեց նրանց գալուստից,

Աշխարհը անգույն նոր գույներ հագավ,

Արևը ժպտաց կապույտ երկնքից,

Շողեր տարածեց գույներով անշտապ:

Երկու ուղիներ խաչվեցին մի օր…

Երկու հրեշտակ դարձան մի ամբողջ,

Երկու երազներ դարձան մի հեքիաթ,

Իսկ հեքիաթը այդ՝ սեր… իրական…

Հեղինակ` Կարեն Շիրինյան