Պետդեպարտամենտը հայտարարել է, որ Էկվադորից ստացված ռուսական զինտեխնիկան Ուկրաինա կտեղափոխվի
Ռուսական արտադրության ռազմական տեխնիկան, որը Էկվադորը նոր տեխնիկայի դիմաց կփոխանցի ԱՄՆ, կառաքվի Ուկրաինա։ Այս մասին էկվադորական Teleamazonas հեռուստաալիքին տված հարցազրույցում ասել է պետքարտուղարի արևմտյան կիսագնդի հարցերով փոխտեղակալ Քեւին Սալիվանը։
«Սա համաձայնագիր է Ուկրաինայի կառավարությանը (ռազմական) տեխնիկայի փոխանցման մասին», – պատասխանել է դիվանագետը հաղորդավարի խնդրանքին մեկնաբանել Ռուսաստանի և Էկվադորի միջև լարվածությունը, որը առաջացել է Կիտոյի կողմից ռուսական արտադրության ռազմական տեխնիկան Վաշինգտոն փոխանցելու պատճառով:
«Սա Էկվադորի կառավարության որոշումն է, և մենք շատ ուրախ ենք, որ նա աջակցում է Ուկրաինային իր տարածքը պաշտպանելու ջանքերում», – հավելել է Սալիվանը:
Պատասխանելով այն հարցին, թե արդյոք սարքավորումները փոխանցվել են, դիվանագետն ասել է, որ «այդ հարցը դեռ քննարկվում է Էկվադորի կառավարության կողմից, և այդ որոշումը կայացնում են Էկվադորի իշխանությունները»։
Հունվարի 10-ին երկրի նախագահ Դանիել Նոբոան հայտարարեց, որ Էկվադորը ռուսական և ուկրաինական արտադրության սարքավորումներ կփոխանցի Միացյալ Նահանգներին՝ 200 մլն դոլար ընդհանուր արժողությամբ նոր սարքավորումների դիմաց։ ՌԴ Ռազմատեխնիկական համագործակցության դաշնային ծառայությունը հայտարարել է, որ Ռուսաստանի Դաշնության և Էկվադորի կառավարությունների միջև ռազմական համագործակցության համաձայնագիրը թույլ չի տալիս ռազմական արտադրանքը փոխանցել երրորդ կողմին՝ առանց Մոսկվայի նախնական գրավոր համաձայնության:
2023 թվականի հունվարին ԱՄՆ Հարավային հրամանատարության ղեկավար, գեներալ Լաուրա Ռիչարդսոնն ասել է, որ Վենեսուելան, Կուբան, Նիկարագուան և Լատինական Ամերիկայի վեց այլ երկրներ ունեն ռուսական զենք, և Միացյալ Նահանգները աշխատում է այդ ռուսական զենքը փոխարինել ամերիկյանով, եթե այդ երկրները ցանկանան այն փոխանցել Ուկրաինային։
