Աշխարհը միջուկային պատերազմի շեմին. 40
Սկիզբը` այստեղ
Պետք է միանգամայն լուրջ վերաբերվել ԱՄՆ- ի նախկին նախագահ Դոնալդ Թրամփի զգուշացմանը, որ եթե երկրի նախագահի պաշտոնում վերընտրվի գործող նախագահ Ջո Բայդենը, ապա Միացյալ Նահանգները կներգրավվի Երրորդ համաշխարհային պատերազմի մեջ: ТАСС- ի տեղեկացմամբ , Թրամփն այս մասին օրերս ասել է Այովա նահանգում իր կողմնակիցների առջև ելույթ ունենալիս: Համոզված ենք, որ սա սոսկ նախընտրական հակաքարոզչություն չէ մրցակցի հանդեպ:
«Մենք կհայտնվենք Երրորդ համաշխարհայինում…»,- ասել է ԱՄՆ նախկին նախագահը:
Թրամփը չի ասել միայն այն, որ Բայդենի ընտրության դեպքում ԱՄՆ- ը ոչ միայն կներգրավվի Երրորդ համաշխարհային պատերազմում, կհայտնվի դրա մեջ, այլև հենց Միացյալ Նահանգները կդառնա Երրորդ համաշխարհայինի սկզբնավորողը, հրձիգը:
Թրամփն ավելի վաղ Բայդենի օրոք ԱՄՆ-ին բազմիցս կանխատեսել է ամենավատը։ 2023թ. նոյեմբերին քաղաքական գործիչը հնարավոր է համարել, որ Միացյալ Նահանգների ներկայիս առաջնորդը կարող է իր գործողություններով աշխարհը տանել Երրորդ համաշխարհային պատերազմի և միջուկային հակամարտության, և աշխարհի համար այժմ ամենամեծ սպառնալիքը համարել է ոչ թե գլոբալ տաքացումը, այլ միջուկային պատերազմի վտանգը:
Դեռ անցյալ տարվա նոյեմբերի սկզբին Հռոմի պապ Ֆրանցիսկոսը RAI հեռուստաալիքին տված հարցազրույցում զգուշացրել է «շատ մութ ժամանակի» վրա հասնելու վտանգի մասին: Նա հայտարարել է, որ աշխարհը պատերազմի մեջ է, և այն կարծիքը հայտնել, թե դրա մեղավորը զենքի արդյունաբերությունն է։ Արևմուտքում սպառազինություն արտադրողներն, իհարկե, շահագրգռված են այժմ ընթացող պատերազմներում, նախկինում էլ է այդպես եղել, սակայն միայն զենքի արդյունաբերությունը մեղավոր ներկայացնել, նշանակում է ասել կիսաճշմարտությունը ու դրա ետևում թաքցնել ներկայումս աշխարհում ընթացող երկու հիմնական պատերազմների (Արևմուտքի պատերազմը Ռուսաստանի դեմ և իսրայելա- պաղեստինյանը) իրական պատճառները:
«Ժամանակը շատ մութ է,- РБК- ի փոխանցմամբ , ասել է Հռոմի պապը:- Չի գտնվի հնարավորություն հստակ մտածելու, և ամենամութ ժամը կավելանա»:
Աշխարհը կարծես խելագարվել է. հիմա էլ շվեդներին են կոչ արել պատրաստվել պատերազմի; Շվեդիայի զինված ուժերի գլխավոր հրամանատար Միքայել Բյուդենը և քաղաքացիական պաշտպանության նախարար Կարլ- Օսկար Բուլինը, РБК- ի փոխանցմամբ , շվեդիայի քաղաքացիներին կոչ են արել պատրաստվել նրան, որ երկրում կարող է պատերազմ սկսվել: Բուլինը հայտարարել է, որ խաղաղությունն «անփոփոխ հաստատուն» չէ նույնիսկ Շվեդիայում:
«Շատերը դա ասել են ինձնից առաջ, բայց թույլ տվեք դա անել պաշտոնապես, ավելի ուղիղ և բացարձակ հստակությամբ. Շվեդիայում կարող է պատերազմ սկսվել»,- «The Local» պարբերականի տեղեկացմամբ, ասել է նախարարը:
Բուլինը բոլորին կոչ է արել ներգրավվել «Շվեդիայում տոտալ պաշտպանության» ստեղծման մեջ: Նա պաշտոնյաներին խորհուրդ է տվել ապահովել ապաստարանների գործունեությունը, ընդունել արտակարգ ջրամատակարարման և սննդի մատակարարման ծրագիր, կարծես թե միջուկային պատերազմի դեպքում այս ամենը և որևէ պաշտպանություն կարող է օգնել կամ փրկել:
Բնականաբար, հարց է առաջանում՝ Արևմուտքում մտավոր հետամնաց հիշեցնող այսպիսի անձինք ինչպե՞ս են հայտնվել նման բարձր պետական պաշտոններում: Կարծում ենք, դա ամենաբարձր մակարդակով ծրագրված և ԱՄՆ- ից թելադրված քաղաքականություն է:
Ըստ նախարարի, ձեռնարկությունների և կազմակերպությունների աշխատակիցները պետք է իրենց գործատուին հարցնեն, թե որն է լինելու իրենց դերը պատերազմի դեպքում, և մտածեն, թե ինչ անհրաժեշտ պարագաներ են անհրաժեշտ, որպեսզի կարողանան շարունակել աշխատել դժվարին պայմաններում: Բուլինն ասել է նաև, որ պետական մարմինները նույնպես պետք է արագացնեն հնարավոր ագրեսիայի հետմղման նախապատրաստման տեմպերը:
Շվեդիայի զինված ուժերի գլխավոր հրամանատար Միքայել Բյուդենը TV4 հեռուստաալիքի եթերում մեկնաբանելով նախարարի խոսքերը, իրավիճակը շատ լուրջ է անվանել։ Նա նաև ասել է, որ այժմ Շվեդիայի բոլոր քաղաքացիները պետք է պատրաստվեն պատերազմի հավանականությանը: Նրա խոսքով՝ իրավիճակը դեռ նման չէ «սև գիշերվա», բայց «մենք պետք է հասկանանք, թե իրականում որքան լուրջ է այս իրավիճակը»:
2023թ. դեկտեմբերի վերջին Նիդեռլանդների բանակի հրամանատար, գեներալ-լեյտենանտ Մարտին Վեյնենը նույնպես հայտարարել էր, որ երկիրը պետք է պատրաստ լինի Ռուսաստանի հետ հնարավոր ռազմական հակամարտությանը։ Վեյնենը կարծում է, որ Նիդեռլանդները պետք է հետևեն Ֆինլանդիայի և Բալթյան երկրների օրինակին, որոնց համար նախապատրաստությունը «ինքնին հասկանալի» բան է, քանի որ նրանք սահմանակից են Ռուսաստանին:
«Պետք չէ մտածել, որ մեզ անվտանգությունը երաշխավորված է միայն այն պատճառով, որ մենք գտնվում ենք 1500 կմ հեռավորության վրա»,- ասել է նա:
Դեկտեմբերի 19-ին բելգիական բանակի շտաբի պետ, ծովակալ Միշել Հոֆմանը հայտարարել է, որ «Եվրոպան պետք է շտապ պատրաստվի» Ռուսաստանի հետ հնարավոր հակամարտությանը: Հոֆմանի խոսքով՝ Բրյուսելին ուղղակի սպառնալիք չկա, բայց վտանգ կա Բալթյան երկրների և Մոլդովայի համար:
«Մոսկվան տարածքային պահանջներ չունի ՆԱՏՕ-ի երկրների նկատմամբ, ուստի Ուկրաինայում հաղթանակի դեպքում դաշինքի վրա Ռուսաստանի հարձակման սպառնալիքի մասին հայտարարություններն անհեթեթություն են»,- 2023թ. դեկտեմբերին հայտարարել է ՌԴ նախագահ Վլադիմիր Պուտինը:
Նրա հավաստմամբ, Ռուսաստանը ՆԱՏՕ- ի երկրների հետ պատերազմելու «ոչ մի պատճառ, ոչ մի շահ չունի՝ ոչ աշխարհաքաղաքական շահ, ոչ տնտեսական, ոչ քաղաքական, ոչ ռազմական»։
«Նրանց հետ հարաբերությունները փչացնելու ցանկություն չկա,- ասել է Պուտինը:- Մենք շահագրգռված ենք հարաբերությունների զարգացմամբ։ Ո՞ւմ հետ ենք խնդիրներ ունենում: Այո, ոչ մեկի հետ: Նրանք են, որ արհեստականորեն խնդիրներ են ստեղծում մեզ հետ, որովհետև չեն ցանկանում նման մրցակից ունենալ՝ ի դեմս Ռուսաստանի։ Ահա և վերջ»։
Շարունակելի
Արթուր Հովհաննիսյան
