«Հայաստանի ընդդիմությունը դիմել էր Ռուսաստանին՝ խնդրելով ինչ-որ կերպ աջակցել իրենց». Կոնստանտին Զատուլին
ՌԴ պետդումայի պատգամավոր Կոնստանտին Զատուլինը «Խոսում է Մոսկվան» ռադիոկայանի եթերում հայտարարել է, որ Հայաստանի ընդդիմությունը ժամանակին դիմել է Մոսկվային՝ Նիկոլ Փաշինյանի դեմ պայքարում աջակցություն ստանալու համար։
Զատուլինը, մասնավորապես, հայտարարել է, որ երբ Նիկոլ Փաշինյանը որոշեց 2021 թ․ արտահերթ խորհրդարանական ընտրություններ անցկացնել, ընդդիմությունը դիմել էր Ռուսաստանին և խնդրել ինչ-որ կերպ տեսանելիորեն աջակցել իրենց, սակայն ռուսական կողմը հրաժարվել էր՝ պատճառաբանելով, որ եթե հայկական ընդդիմությունը գա իշխանության, կարող է հրաժարվել 2020 թ․ նոյեմբերի 9-ի եռակողմ հայտարարությունից։
«Մոսկվան կարծում էր՝ փաստաթղթից հրաժարվելը կարող է նոր պատերազմ հրահրել, չէր ցանկանա խառնվել դրա մեջ։ Մենք ասացինք՝ ոչ մի կերպ։ Եթե Փաշինյանը ստորագրել է 2020 թ․ նոյեմբերի 9-ին Ղարաբաղում պատերազմի ավարտի այս հայտարարությունը։ Եթե նա պաշտոնանկ արվի, նորից ռազմական գործողություններ կսկսվեն, մենք կներգրավվենք, մեզ կներքաշեն, իսկ մենք չենք ուզում, մենք մեր գործերն ունենք․ այնպես որ, ձեռք մի տվեք նրան», – պատմել է Զատուլինը։
Զատուլինը նաև հավելել է, որ «Այսօր ԼՂ-ում ոչ մի հայ չկա, հարյուր հազար մարդ հետ է քաշվել ու գնացել։ Այս տեղահանությունն իրականացվել է Ադրբեջանի գործողությունների ազդեցության տակ, որի հետ մենք չենք վիճել այս հարցում՝ ստանձնելով խաղաղապահ գործառույթներ»։
Քաղաքական գործիչը քննադատել է նաև ՀԱՊԿ-ին, որը ժամանակին չարձագանքեց 2022 թվականի սեպտեմբերյան իրադարձություններին, երբ Ադրբեջանը ռազմական գործողություններ իրականացրեց Հայաստանի դեմ։
«Պետք էր անհապաղ արձագանքել, գոնե կոչ անել, հրապարակային հայտարարել և այլն։ Արձագանքն ուշացավ։ Ու դրանից օգտվեց Փաշինյանը։ Նա շատ խելացի մանիպուլյացիա է անում, նա մանիպուլյատոր է։ Դա միակ բանն է, որ նա կարողանում է անել և անում է։ Ու պետք է ասել, որ բուն Հայաստանում Ռուսաստանի նկատմամբ վստահությունը նվազում է, որովհետև առավոտից երեկո մարդկանց ուղեղները լվանում են համացանցում, հեռուստատեսությամբ և այլն։ Եվ մենք պետք է պայքարենք դրա դեմ»,- ասել է նա։