Հունգարիայի վարչապետը դեմ է Լեռնային Ղարաբաղի հարցում Ադրբեջանի դեմ ցանկացած պատժամիջոցի
Հունգարիայի վարչապետ Վիկտոր Օրբանը կտրականապես չի պաշտպանում Եվրախորհրդարանի կոչը՝ դիտարկել Ադրբեջանի կառավարության ներկայացուցիչների դեմ ուղղված նպատակային պատժամիջոցները՝ հրադադարի ռեժիմը խախտելու և Լեռնային Ղարաբաղում մարդու իրավունքների խախտման համար։
Ինչպես հաղորդում է Европейская правда-ն, այս մասին նա ասել է հոկտեմբերի 6-ին Գրանադայում ԵՄ առաջնորդների ոչ պաշտոնական հանդիպումից առաջ լրատվամիջոցների հետ զրույցում։
Օրբանին խնդրել են մեկնաբանել Ադրբեջանի վերաբերյալ Եվրախորհրդարանի վերջին բանաձեւը, որում Եվրախորհրդարանի պատգամավորները կոչ են արել վերանայել հարաբերությունները Բաքվի հետ և դիտարկել նպատակային պատժամիջոցները:
«Ադրբեջանը առանցքային նշանակություն ունեցող երկիր է։ Առանց Ադրբեջանի՝ մենք էներգետիկ անկախության չենք հասնի… Եթե ուզում ենք ազատվել Ռուսաստանից էներգետիկ կախվածությունից, մեզ պետք է Ադրբեջանը, սա շատ ակնհայտ է։ Սա ռազմավարական նշանակություն ունեցող երկիր է»,- ասել է Վիկտոր Օրբանը։
