Մոսկվան շատ պարզ ասաց՝ Նիկոլ, Զելենսկին ես, Նիկոլ, Սահակաշվիլին ես, չասեց միայն սա՝ այս իրողությունից բխող բոլոր հետևանքներով հանդերձ. 4

Հիմա ամբողջ խնդիրն այն է, թե ինչ կանի Մոսկվան

 

Սկիզբը՝ այստեղ 

Այսօր Հայաստանի հերթական սև օրն է. «Ազգային ժողով» կոչվածն այսօրվա՝ հոկտեմբերի 3-ի նիստում իր ՔՊ- ական մեծամասնությամբ՝ Նիկոլի ոհմակով, վավերացրեց Միջազգայի քրեական դատարանի (ՄՔԴ) Հռոմի կանոևադրությունը, որին անդրադարձել էինք սույն հոդվածաշարի նախորդած հրապարակմամբ: Սպասվում է, որ վավերացումից հետո Հայաստանի նախագահի պաշտոնը զբաղեցնողը կստորագրի փաստաթուղթը, և այն ուժի մեջ կմտնի 60 օրից:

«Հայաստանի Հանրապետություն» կոչվածն այսպիսով այսօր, ըստ էության, պաշտոնապես հայտարարեց, որ ինքը ոչ միայն Ռուսաստանի ռազմավարական դաշնակիցը չէ, ոչ միայն սովորական դաշնակիցը չէ, այլև թշնամին է, որը պատրաստ է Հայաստանում ՌԴ նախագահ Վլադիմիր Պուտինի հայտնվելու դեպքում ձերբակալել նրան ու հանձնել ՄՔԴ-ին՝ ի կատար ածելով Պուտինին ձերբակալելու հիշյալ դատարանի օրդերը: Կարծում ենք, միայն տխմարը կամ նույնիսկ անհուսալի տխմարը չի հասկանա, թե Հայաստանի, Արցախի, հայերիս թիվ 1 ներքին թշնամի Նիկոլի ոհմակի այս քայլից հետո ինչ է սպասվում Հայաստանին և հայերիս, ինչ է սպասվում մեզ շատ շուտով Ռուսաստանին մեզ թշնամի դարձնելուց հետո…

Այո՛, Ֆեյսբուքի օգտատերերից Տ. Հակոբյանը ճիշտ է նկատել՝ Ռուսաստանն առայժմ զգուշացնում է, բայց մութ ու ցուրտ տարիներին երանի ենք տալու… ՖԲ- ի օգտատերերից մեկ ուրիշի՝ Անի Կաղինյանի դիտարկումը ՝ «Գազ, էլեկտրաէներգիա, ցորեն… Դե հիմա պատրաստվեք ձմռանը դիմակայելու…»:

Ազատամարտիկ, հետախույզ, ռազմական ու հասարակական գործիչ Գևորգ Գևորգյանը ֆեյսբուքյան իր էջում գրել է .

«Կետ առ կետ նշեմ այս ստորաքարշների քայլերը մոտ ապագայում։

1.թուրքիայի պահանջով ատոմակայանի փակում, որը լիարժեք հիմքեր կտա Հայաստանն անարգել ռմբակոծելու։

2.Մինչ այդ 102-րդ ռազմաբազայի դուրս բերում, պատճառաբանությամբ, թե իբր ՀԱՊԿ-ը իր պարտավորությունները չի կատարում։

3.ՀԱՊԿ-ից դուրս գալու որոշում։

4.Ռուսական գազից հրաժարում և «խաղաղության» պայմանագրի շրջանակում ադրբեջանական գազի մուտք Հայաստան, որն էլ ամբողջովին կհանգեցնի տնտեսության ադրբեջանականացմանն ու թրքացմանը։

5.Հայաստանին թողնել առանց բարեկամների և դաշնակիցների, ռազմաքաղաքական ծանրագույն իրավիճակում և ստորագրել Ալեքսանդրապոլ 2-ը։

Իսկ ինչ պետք է անի ընդդիմությունը։

Կյանքի գնով ազատագրի Հայաստանը և վե՜րջ»։

Բայց հենց այստեղ մի շատ կարևոր հարց է առաջանում՝ ո՞ր ընդդիմությունը… Եթե «Ազգային կոմիտե» հորջորջվածը, ապա այն և, ընդհանրապես, պայքարի առաջնորդությունը ստանձնած ընդդիմադիր հայտնի ուժերը, ինչպես սեպտեմբերի 19- ից առ այսօր հաջորդած իրադարձությունները ցույց տվեցին, դա անողը չեն: Այդ ինչպե՞ս եղավ, որ պատերազմից երեք տարի անց Նիկոլը մնաց աթոռին ու լիովին ապացուցեց, որ պետական դավաճանը միայն ինքը չէ…

Հռոմի կանոնադրության վավերացմանը և ՄՔԴ իրավասության հետադարձ ճանաչման մասին հայտարարության ընդունմանը կողմ է քվեարկել խորհրդարանի 60 պատգամավոր, դեմ ՝ 22- ը: «Հայաստան» և «Պատիվ ունեմ» խմբակցությունները կանոնադրության քննարկման ժամանակ լքեցին նիստերի դահլիճը և չմասնակցեցին քվեարկությանը:

Թեև ընդդիմադիր խմբակցությունները ձևականորեն հանդես են եկել հայտարարությամբ և դատապարտել այս հարցի վերաբերյալ իշխանությունների որոշումը՝ նշելով, որ նրանք նման քայլով հարվածի տակ են դնում Ռուսաստանի հետ դաշնակցային հարաբերությունները, ինչը հղի է Հայաստանի համար լուրջ հետևանքներով, սակայն, ի սկզբանե իրենց էլ պարզ էր, որ իրենց դեմ լինելը գործնականում ոչինչ չի փոխելու, քանի որ «Ազգային ժողով» կոչվածում փոքրամասնություն են:

Հայաստանի կողմից Հռոմի կանոնադրությունը վավերացնելու առնչությամբ Կրեմլի առաջին արձագանքը. այսօրվա ճեպազրույցում նշելով, որ ՄՔԴ- ի որոշումները Ռուսաստանի համար «անօրինական են, առոչինչ», և Երևանի կողմից Հռոմի կանոնադրությանը միանալը, ըստ էության, համարելով ոչ կոռեկտ, ՌԴ նախագահի մամուլի քարտուղար Դմիտրի Պեսկովը, ТАСС- ի տեղեկացմամբ , ասել է.

«Հայաստանը մեզ համար բարեկամ պետություն է, մեր գործընկերը։ Եվ, անշուշտ, մեզ շատ բան է միավորում Եղբայրական հայ ժողովրդի հետ: Բայց, դրա հետ մեկտեղ, Հայաստանի գործող ղեկավարությանը մենք լրացուցիչ հարցեր կունենանք։ Դրանք նախապես փոխանցվել են հայկական կողմին։

Մոսկվայի հետ ինչ-որ երկկողմ համաձայնագրի նախապատրաստման մասին Երևանի հայտարարությունները, որոնք թույլ կտան չկատարել Պուտինի ձերբակալման միջազգային քրեական դատարանի օրդերը, «միայն հայկական կողմի գաղափարն է»: Անհասկանալի է, թե ինչպես նրանք կարող են ապահովել հատուկ պայմաններ, բացառություններ»:

«Իհարկե, մենք չէինք ցանկանա, որ երբևէ ինչ-ինչ պատճառներով նախագահը ստիպված լիներ հրաժարվել Հայաստան այցելություններից»,- հավելել է Պեսկովը

Ըստ ՌԴ նախագահի մամուլի քարտուղարի, Կրեմլում «բացարձակապես համաձայն չեն» ՀՀ վարչապետ Նիկոլ Փաշինյանի այն հայտարարությանը, թե Հռոմի կանոնադրությանը Երևանի միացումը «կապված է երկրի անվտանգությունն ապահովելու համար ՀԱՊԿ գործիքի և ռուս-հայկական գործընկերության անբավարարության հետ»:

Անդրադառնալով այն իրավիճակին, որում հայտնվել է Արցախը, Պեսկովն իրավացիորեն ասել է, որ Լեռնային Ղարաբաղի հարցում «միշտ պետք է հիշել պարոն Փաշինյանի որոշումը, որը <…> ճանաչել է Ադրբեջանի սահմանները 1991 թվականի դրությամբ», և հավելել՝ «սա է այն ամբողջ իրավիճակի նախերգանքը, որն այժմ կա»:

Ըստ ՌԴ նախագահի մամուլի քարտուղարի, Ռուսաստանն ուշադիր հետևում է Ղարաբաղի հայերի ճակատագրին, «Մարդասիրական օգնություն ենք ցուցաբերում, մեր խաղաղապահները շարունակում են իրենց գործունեությունը»։

Ս. թ. սեպտեմբերի 11-ին Նիկոլը հայտնել էր, որ Հայաստանը սկսել է Հռոմի կանոնադրության վավերացումը՝ Ադրբեջանի հետ սահմանին 2021թ. մայիս — 2022 թ. սեպտեմբեր ամիսների ընթացքում տեղի ունեցած իրադարձությունները հետաքննելու համար: Նիկոլի պատճառաբանությունը, թե Հռոմի կանոնադրության վավերացումն էապես կուժեղացնի Հայաստանի անվտանգությունը, երբ «ՀԱՊԿ-ը չի կատարել և չի կատարում իր պարտավորությունները», ոչ միայն լոլոների շարքից է, այլև հրեշավոր կեղծիք՝ հանրության միամիտ և անտեղյակ հատվածին մոլորեցնելու, խաբելու, ինչպես նաև ՀԱՊԿ- ի և Ռուսաստանի դեմ հանրությանը տրամադրելու համար:

Փաստն այն է, որ Նիկոլը կամ նրա իշխանությունն ինչպես 44- օրյա պատերազմի ընթացքում, այնպես էլ 2021թ. մայիսին հերթական անգամ հանցավոր անգործությամբ պետական դավաճանություն դրսևորելով, ինչպես նաև ունենալով ՀԱՊԿ- ին վարկաբեկելու նենգ ու վտանգավոր նպատակներ, օգնություն ստանալու համար չեն դիմել նշված կազմակերպությանը՝ այդ օգնությունը ստանալու համար նախատեսված «Հավաքական անվտանգության մասին» պայմանագրի 4-րդ  հոդվածով:

Համաձայն վերոնշյալ պայմանագրի 4-րդ հոդվածի, «եթե անդամ պետություններից որևէ մեկը ենթարկվի ագրեսիայի որևէ պետության կամ պետությունների խմբի կողմից, ապա անդամ պետությունների կողմից դա կհամարվի որպես ագրեսիա սույն Պայմանագրի բոլոր մասնակից պետությունների դեմ:

Մասնակից պետություններից որևէ մեկի դեմ ագրեսիայի ակտի ի հայտ գալու պարագայում, մնացած մասնակից պետությունները կցուցաբերեն անհրաժեշտ օժանդակություն` ներառյալ ռազմական օգնությունը, նաև կցուցաբերեն օժանդակություն իրենց տրամադրության տակ գտնվող միջոցներով` հավաքական պաշտպանության իրավունքի իրագործման կարգին համապատասխան` համաձայն ՄԱԿ-ի կանոնադրության 51-րդ հոդվածի»:

Փոխարենը՝ այն ժամանակ Հայաստանի վարչապետի պաշտոնակատարի դերում գտնվող Նիկոլը խորամանկ, ստոր ու մանիպուլյատիվ հնարք գործադրելով, նամակներ է ուղարկել  Հավաքական անվտանգության մասին պայմանագրի կազմակերպության Հավաքական անվտանգության խորհրդի նախագահող Տաջիկստանի նախագահին և խորհրդի անդամներին՝ պայմանագրի 2-րդ հոդվածով  նախատեսված խորհրդատվությունների ընթացակարգը գործի դնելու խնդրանքով, որը չի նախատեսում Հայաստանին պաշտպանելու նպատակով նրա վրա հարձակված պետության դեմ ռազմական գործողություն:

 

Շարունակելի

Արթուր Հովհաննիսյան