Արդարադատության միջազգային դատարանը հաստատեց, որ Ադրբեջանը չի կատարել իր որոշումը և պարտավոր է կատարել այն. Արտակ Բեգլարյան
Արցախի նախկին ՄԻՊ, պետնախարար Արտակ Բեգլարյանը թելեգրամյան իր էջում գրել է.
Ի՞նչ է նշանակում Արդարադատության միջազգային դատարանի հուլիսի 6-ի որոշումը Քաշաթաղի (Լաչին) միջանցքում ադրբեջանական անցակետ տեղադրելու մասին Հայաստանի հայտարարության վերաբերյալ։
- Դատարանը հաստատել է 2023 թվականի փետրվարի 22-ի որոշումը, որով Ադրբեջանին պարտավորեցրել է ձեռնարկել բոլոր միջոցները՝ Լաչինի միջանցքով երկու ուղղություններով քաղաքացիների, տրանսպորտային միջոցների և ապրանքների անխափան տեղաշարժն ապահովելու համար։ Այս հաստատումն արդեն իսկ նշանակում է դատարանի դիրքորոշումը, որ Ադրբեջանը չի կատարել այդ որոշումը և պարտավոր է կատարել այն։
- Դատարանը համարել է, որ 2023 թվականի փետրվարի 22-ի վճիռը լրացնելու անհրաժեշտություն չկա։ Այսինքն՝ ենթադրվում է, որ դատարանը չի որոշել խորանալ տարբեր քաղաքական և տեխնիկական կետերի մեջ: Ամեն դեպքում, այս որոշման մանրամասները հնարավոր կլինի պարզ հասկանալ մի քանի օրից, երբ այն հրապարակվի։
- Ակնհայտ է, որ այս որոշումը չի նշանակում ադրբեջանական ապօրինի անցակետի օրինականացում, բայց կարող է ունենալ նաև հակասական մեկնաբանություն, քանի որ հաստատում է խախտված երթևեկության առկայությունը։ Ինչ միջոցներով է ադրբեջանական կողմը խախտում երթևեկությունը (անցակետ, բանակ, բետոնապատնեշներ, ահաբեկիչներ), դատարանը սրան չի անդրադարձել։
Մնում է, որ միջազգային հանրությունը (առաջին հերթին ՄԱԿ-ի Անվտանգության խորհուրդը) համապարփակ և հրատապ միջոցներ ձեռնարկի փետրվարի 22-ի վճիռը պատշաճ կերպով իրականացնելու համար՝ հատկապես հունիսի 15-ից մարդասիրական մատակարարումների ամբողջական դադարեցման համատեքստում։
