Բայդենն ու Մակրոնը հեռախոսազրույց են ունեցել․ քննարկել են Ֆրանսիայի նախագահի այցը Չինաստան
Ապրիլի 20-ին հեռախոսազրույց են ունեցել ԱՄՆ նախագահ Ջո Բայդենը և Ֆրանսիայի նախագահ Էմանուել Մակրոնը, որի ընթացքում քննարկվել է վերջինիս պաշտոնական այցը Չինաստան։ Այս մասին հայտարարություն է տարածել Սպիտակ տունը։
Հիշեցնենք, որ Չինաստան վերջին այցի ընթացքում նախագահ Մակրոնի հայտարարությունները քննադատության էին արժանացել ԵՄ երկրների և ԱՄՆ-ի կողմից։ Մակրոնը Չինաստանի նախագահ Սիին կոչ էր արել օգնել կանգնեցնել Ռուսաստանի հարձակումը Ուկրաինայի վրա և «բոլոր կողմերին բերել բանակցային սեղանի շուրջ»։ Այցից հետո Politico-ին տված հարցազրույցում Ֆրանսիայի նախագահը նշել էր, որ Եվրոպան պետք է նվազեցնի կախվածությունը ԱՄՆ-ից և չխառնվի ԱՄՆ-Չինաստան կոնֆլիկտին Թայվանի պատճառով։
Սպիտակ Տան հայտարարության մեջ ասվում է, որ կողմերը վերահաստատել են Թայվանի նեղուցում խաղաղության պահպանման անհրաժեշտությունը, ինչպես նաև իրենց անփոփոխ աջակցությունը Ուկրաինային՝ ընդդեմ Ռուսաստանի դաժան ագրեսիայի։
