Բելգիան կոռուպցիոն սկանդալի շրջանակում մեղադրանք է առաջադրել ԵԽ ևս մեկ պատգամավորի
Բելգիայի դատախազությունը կոռուպցիոն մեղադրանքներ է ներկայացրել Եվրախորհրդարանի ևս մեկ պատգամավորի՝ Մարկ Տարաբելլայի դեմ՝ Եվրախորհրդարանում ծագած սկանդալի շրջանակներում, գրում է բելգիական Le Soir օրաթերթը։
Բելգիացի սոցիալիստ Տարաբելլան ուրբաթ օրը ձերբակալվել է։
Ինչպես հայտնում է Le Soir-ը՝ վկայակոչելով դաշնային դատախազների հայտարարությունը, նա մեղադրվում է կոռուպցիայի, փողերի լվացման և հանցավոր կազմակերպությանն անդամակցելու համար։
Տարաբելլայի փաստաբան Մաքսիմ Տոլլերն ասել է, որ իր պաշտպանյալը Բելգիայի իշխանությունների կողմից անցկացված հարցաքննության ժամանակ հերքել է որևէ ապօրինի գործողության իրականացումը:
«Կատարագեյթ» անվանումը ստացած սկանդալը ծագել է անցյալ տարվա դեկտեմբերին, երբ իշխանությունները մեղադրանք են առաջադրել Եվրախորհրդարանի հետ կապ ունեցող չորս անձանց՝ առ այն, որ Աշխարհի առաջնության հյուրընկալող Կատարը նրանց շռայլ կանխիկ գումար և նվերներ է տվել՝ որոշումների կայացման վրա ազդելու համար:
