Լուկաշենկոյի մոտեցումը Ղարաբաղյան հակամարտությանը հասկանալի է և ազնիվ. Բելառուսի ԱԳՆ
Բելառուսը գործնականում հաստատում է իր հավատարմությունը դաշնակցային պարտավորություններին։ Մինսկը մշտապես հետևողականորեն հանդես է եկել Ղարաբաղյան հակամարտության խաղաղ կարգավորման օգտին։ Այս մասին ասվում է Բելառուսի ԱԳՆ պաշտոնական ներկայացուցիչ Անատոլի Գլազի մեկնաբանության մեջ, որը հրապարակվել է գերատեսչության կայքում։
«Գիտեք, Հայաստանի ԱԳՆ-ն բավական ինքնատիպ դիրքորոշում է որդեգրել։ Իր դաշնակցային պարտավորություններին Բելառուսը հավատարիմ է ոչ թե խոսքով, այլ գործով, որը հաստատում է իր ողջ պատմության ընթացքում։ Այդ թվում ՝ այս դժվարին պահին», – նշել է Գլազը։
Հիշեցնենք, որ ՀՀ ԱԳՆ մամուլի խոսնակ Վահան Հունանյանը, անդրադառնալով Բելառուսի նախագահ Ալեքսանդր Լուկաշենկոյի դիրքորոշումներին, ասել էր, որ Հայաստանի և Ադրբեջանի հարաբերությունների կարգավորման գործընթացի, ինչպես նաև սահմանին տիրող իրավիճակի վերաբերյալ Լուկաշենկոյի հայտարարությունները դաշնակցային չեն և բանակցությունների տրամաբանությունից կտրված են:
Բելառուսի ԱԳՆ պաշտոնական ներկայացուցչի խոսքով՝ Մինսկի արտաքին քաղաքականության առանձնահատկություններից մեկը պարկեշտությունն է։
Եվ «եթե մյուս երկրները նույն կերպ վարվեին, ապա շատ խնդիրներից հնարավոր կլիներ խուսափել»:
Նա նաև նշել է, որ հայ-ադրբեջանական հակամարտության վերաբերյալ Լուկաշենկոյի մոտեցումը հիմնված է իրականության վրա, հասկանալի է և ազնիվ` դաշնակցի տեսանկյունից։
«Հիշեցնեմ, որ բելառուսական կողմը հետևողականորեն հանդես է եկել Ղարաբաղյան հակամարտության խաղաղ կարգավորման օգտին՝ զգալի ջանքեր գործադրելով բոլոր հասանելի ձևաչափերում՝ ինչպես բազմակողմ, այնպես էլ երկկողմ», – ավելացրել է մամուլի քարտուղարը:
Նրա խոսքով` Ադրբեջանի ու Հայաստանի նախկին և ներկա առաջնորդները շնորհակալ են բելառուսական պետության ղեկավարին Հարավային Կովկասի բոլոր ժողովուրդների համար խաղաղության ու բարեկեցության անկեղծ ցանկության, հայ-ադրբեջանական հարաբերությունների կարգավորման գործում անձնական ներդրման համար:
«Ուստի խորհուրդ ենք տալիս մեր ընկերներին և գործընկերներին ուշադիր կարդալ և վերընթերցել բելառուսական պետության ղեկավարի բազմաթիվ ելույթները այս բարդ, բայց միանգամայն լուծելի հարցի վերաբերյալ», – եզրափակել է Գլազը:
Հիշեցնենք նաև, որ հոկտեմբերի 28-ին ՀԱՊԿ արտահերթ նիստում Լուկաշենկոն հայտարարել էր, որ Ադրբեջանը ՀԱՊԿ անդամ պետությունների համար թշնամի կամ հակառակորդ չէ, ճիշտ չի լինի ՀԱՊԿ-ը հակադրել Ադրբեջանին: Նա շեշտել էր` Ադրբեջանն այժմ գլխավորում է բացարձակապես «մեր մարդը՝ Իլհամ Ալիևը»։ Բելառուսի նախագահը հավելել էր, որ և՛ Ադրբեջանը, և՛ Հայաստանը Բելառուսի համար «հարազատ» երկրներ են, և հակամարտությունը երկու երկրների միջև պետք է կարգավորվի բացարձակապես խաղաղ ճանապարհով:
Երեկ Մինսկում ՀԱՊԿ գլխավոր քարտուղար Ստանիսլավ Զասի հետ հանդիպման ժամանակ էլ Լուկաշենկոն ասել է, որ Բաքվի և Երևանի միջև հակամարտության խաղաղ կարգավորման տարբերակներ վաղուց է առաջարկել, սակայն Հայաստանը չի համաձայնել, և Ադրբեջանի նախագահին այլ լուծում չի մնացել, քան ուժայինը:
