Նարեկը վիրավորվել է, «ՈւՐԱԼ»-ով փորձել են տեղափոխել հոսպիտալ, բայց արկն ընկել է ավտոմեքենայի վրա. News.am
NEWS.am-ը գրում է․ Սեպտեմբերի 13-ին Ադրբեջանի սանձազերծած հարձակման հետեւանքով զոհվել է 18-ամյա պարտադիր ժամկետային զինծառայող Նարեկ Հայրապետյանը։
Նարեկը երեք ամիս էր առաջ էր զորակոչվել բանակ, ծառայում էր Կապանում, հրետանավոր էր։
«Նարեկը շատ էր սպասում ծառայությանը, սիրում էր զինվորականի կյանքը։ Մինչեւ ծառայության մեկնելը հաճախ այցելում էր «Եռաբլուր», ասում էր՝ գնում եմ տղաներին տեսնելու»,- NEWS.am-ի հետ զրույցում պատմեց Նարեկ Հայրապետյանի հայրը՝ Արման Հայրապետյանը։
Նարեկը Երեւանից էր, ընտանիքի միակ որդին, ուներ ավագ քույր։ Հայրն աշխատում է «Երևանի աղբահանություն և սանիտարական մաքրում» համայնքային հիմնարկում, մայրը տնային տնտեսուհի է։
Նարեկը սեպտեմբերի 13-ին վերջին անգամ կապվել է ծնողների հետ՝ վստահեցնելով, որ իր հետ ամեն բան կարգին է, անհանգստանալու կարիք չկա։
«Նարեկը զոհվել է դրանից ժամեր անց։ Իր ընկերների փոխանցմամբ՝ ինքը մարտի ժամանակ վիրավորվել է, «ՈւՐԱԼ»-ով փորձել են տեղափոխել հոսպիտալ, բայց արկն ընկել է ավտոմեքենայի վրա։ Կոնկրետ չգիտեմ՝ քանի մարդ է եղել ավտոմեքենայում, բայց բոլորը զոհվել են»,- ասաց Նարեկի հայրը։
Նարեկ Հայրապետյանը հուղարկավորվել է նախօրեին՝ սեպտեմբերի 16-ին, «Եռաբլուր» զինվորական պանթեոնում։
Հիշեցնենք, որ սեպտեմբերի 13-ին՝ ժամը 00:05-ից, Ադրբեջանի ԶՈւ ստորաբաժանումները սահմանի ողջ երկայնքով հրետանային միջոցներից, խոշոր տրամաչափի հրաձգային զինատեսակներից սկսել էին ինտենսիվ կրակ վարել հայկական դիրքերի ուղղությամբ՝ կիրառելով նաեւ ԱԹՍ-ներ: Հակառակորդը հարվածում էր թե՛ ռազմական, թե՛ քաղաքացիական օբյեկտներին։
Պաշտպանության նախարարության հաղորդմամբ՝ սեպտեմբերի 14–ին, ժամը 20։00–ից բոլոր ուղղություններով կրակը գրեթե դադարել է, էական միջադեպեր չեն արձանագրվել։ Սեպտեմբերի 16-ի ժամը 09:00-ի դրությամբ՝ հայ-ադրբեջանական սահմանին իրադրության փոփոխություն չի արձանագրվել:
Սեպտեմբերի 16–ի դրությամբ հայկական կողմն ունի հաստատված 135 զոհ։
Սեպտեմբերի 14–ին վարչապետ Նիկոլ Փաշինյանը ԱԺ–Կառավարություն հարցուպատասխանի ժամանակ հայտարարել էր, որ այդ պահի դրությամբ՝ ադրբեջանցիները Հայաստանից օկուպացրել են 10 քառակուսի կմ։
