Freedom House-ը Ադրբեջանից պահանջում է վերականգնել Արցախի գազամատակարարումը
Freedom House իրավապաշտպան կազմակերպությունն Ադրբեջանից պահանջում է վերականգնել Արցախի գազամատակարարումը։
«Ադրբեջանը պետք է կանխի հումանիտար ճգնաժամը՝ վերականգնելով գազի անխափան մատակարարումը Լեռնային Ղարաբաղի բնակչությանը, ովքեր շաբաթներ շարունակ դիմացել են սառնամանիքին առանց ջեռուցման և տաք ջրի»,-ասված է կազմակերպության տարածած հայտարարության մեջ։
Հիշեցնենք, որ ԵՄ ԱԳ մամուլի ծառայությունը (EEAS) երեկ հայտարարություն ՝ էր տարածել, նշելով, որ ԵՄ-ը անհանգստացած է Ստեփանակերտի գազամատակարարման խափանման մասին հաղորդագրություններով:
Հայտարարության մեջ մասնավորապես նշված է, որ անհրաժեշտ է շտապ ապահովել տուժած բնակչության գազամատակակարման վերականգնումը հատկապես եղանակային վատ պայմաններում։ ԵՄ-ը գազատարը վերահսկող Ադրբեջանի իշխանություններին կոչ է արել թույլ տալ գազամատակարարման վերականգնումը։
«Եվրամիությունը ուշադիր հետևում է այս և տարածաշրջանում տեղի ունեցող այլ զարգացումներին և կշարունակի իր ներգրավվածությունը Հարավային Կովկասում կայուն խաղաղության և կայունության համար»,- նշված է հայտարարության մեջ։
