ԱՄՆ-ը, Իսրայելը և Թուրքիան «աշխատում են» Ռուսաստանին ու Իրանին Սիրիայի արևելքից վտարել
Տպավորություն է ստեղծվում, որ շուտով անկախ Սիրիան կդադարի գոյություն ունենալ և կկրկնի Արցախի Հանրապետության ողբերգական ճակատագիրը: Այսինքն՝ պետականության նման մի բան կմնա միայն այնտեղ, որտեղ առկա է Ռուսաստանի և Իրանի ռազմական անձնակազմի, ինչպես նաև Իրանի հետ կապված աշխարհազորայինների ռազմական ներկայությունը: Եվ, իհարկե, Դամասկոսը, որտեղ շարունակում են իշխել Սիրիայի նախագահ Բաշար ալ-Ասադը և նրա հավատարիմ կառավարությունը: Մնացած տարածքներում լինելու է Թուրքիայի և ԱՄՆ-ի օկուպանտների «իշխանությունը», որն աջակցվում է Իսրայելի տարածաշրջանային օդային գերիշխանությամբ: Այս կազմաձևը առաջին պլան է մղվել այն բանից հետո, երբ սիրիական բանակը հարձակում է ձեռնարկել Միացյալ Նահանգների, Անգլիայի, Հորդանանի և Իսրայելի «աջակցությունը» վայելող, Հորդանանի սահմաններին տեղակայված ահաբեկիչների դեմ։ Հենց այս հանգամանքն էլ խթան, կատալիզատոր է դարձել Սիրիայի մասնատման և բաժանման արագացված գործընթացների համար:
Սիրիական բանակի գրոհներն ահաբեկիչների դեմ պայմանավորված էին նրանով, որ հունվարի սկզբից Իսրայելի ռազմական ավիացիան հրթիռային հարվածներ է հասցնում Սիրիային: Ընդ որում, այս անգամ ավիահարվածների մեծ մասը (իսկ դրանք արդեն ավելի քան 20-ն են) հասցվում է… Սիրիայի արևելյան մասի ուղղությամբ՝ հարևան Իրաքի հետ սահմաններին: Մենք արդեն գրել ենք, որ այնտեղ՝ Սիրիայի արևելքում, արդեն փորձեր են արվել գնդակոծել ու հարձակվել հայ-քրդական Էլ-Քամիշլի քաղաքի մոտակայքում գտնվող ռուսական ռազմաբազայի վրա: Եվ այժմ կան նոր հաղորդագրություններ, որոնք ցույց են տալիս, որ Իսրայելը, որոշակի մտադրությամբ, իր օդա-հրթիռային հարվածները հասցնում է հենց Սիրիայի արևելքի ուղղությամբ, այն բանից հետո, երբ ռուսները փորձում էին մեծացնել իրենց ներկայությունը երկրի այս մասում։
Հունվարի 13-ին նկատվել է Սիրիայի հյուսիս-արևելք մտնող ԱՄՆ-ի մեծ ռազմական շարասյուն, որը վերջին հինգ օրվա ընթացքում երկրորդ նման դեպքն էր, երբ ամերիկյան զորքերը Իրաքից տեղափոխվել են Սիրիա, հունվարի 14-ին հայտնել է «Al-Masdar News» լիբանանյան գործակալությունը: Տեղական աղբյուրների տվյալների համաձայն՝ ԱՄՆ տասնյակ ռազմական բեռնատարներ և այլ ռազմական մեքենաներ «Ալ-Վալիդ» անցակետով մտել են սիրիական Հասաքա նահանգ, որը Սիրիային կապում է Իրաքի Նայնավա (Նինվե) նահանգի հետ: ԱՄՆ զինված ուժերի շարասյունը տեղափոխում էր ինչպես անձնակազմ, այնպես էլ բեռներ Սիրիայի տարածքում գտնվող իր կայաններից մեկի տարածք: ԱՄՆ զինված ուժերը հանգստյան օրերին նույն սահմանային անցակետով զորք ու մատակարարումներ էին տեղափոխում նախքան Սիրիայի արևելքում գտնվող Դեյր-էլ-Զոր նահանգի իր կայաններից մեկի մեկնելը, նշում է «Al-Masdar News»-ը: Հատկանշական է, որ Սիրիայի արևելյան շրջաններ ամերիկյան լրացուցիչ զորախումբ է տեղակայվել մի քանի ժամ անց, երբ իսրայելական օդուժը վերջին ամիսների ամենազանգվածային հարվածները հասցրեց արաբական հանրապետության այս հատվածին:
Դրա հետ մեկտեղ, ԱՄՆ հետախուզության բարձրաստիճան պաշտոնյան, ով գիտեր իսրայելական հարձակման մասին, հունվարի 13-ին «Associated Press»-ին (AP) հայտնել է, որ ավիահարվածներն իրականացվել են ԱՄՆ կողմից տրամադրված հետախուզական տվյալների միջոցով և ուղղված են եղել «Սիրիայում մի շարք պահեստներին, որոնք օգտագործվել են իրանական զենքի պահպանման և պատրաստման համար»: AP-ի մեկ այլ զրուցակից, ԱՄՆ վարչակազմի ներկայացուցիչը, անանուն մնալու պայմանով, հայտնել է, որ պետքարտուղար Մայքլ Փոմպեոն «երկուշաբթի՝ հունվարի 11-ին, Վաշինգտոնի «Միլանո» սրճարանում ավիահարվածները քննարկել է Մոսադի ղեկավար Յոսի Քոհենի հետ»: ԱՄՆ-ի և Իսրայելի կողմից ինչպես սիրիական բանակի, այնպես էլ Ռուսաստանի ու Իրանի ռազմական ուժերի դեմ նոր ռազմական սադրանքներ նախապատրաստելու այլ ապացույցներ, մեր կարծիքով, այլևս անհրաժեշտ չեն: Եվ եթե այս տվյալները համադրենք այն փաստի հետ, որ Թուրքիան փորձում է «վերակենդանացնել» թուրքամետ ահաբեկիչներին Իդլիբում, իսկ աշնանը թուրքերն ու հրեաները ակտիվորեն պատերազմել են արցախահայության դեմ և հասել են նրան, որ Ռուսաստանը համաձայնեց Արցախում թուրքական ռազմական ներկայությանը, ապա մենք կստանանք լուրջ և գրեթե ամբողջական պատկերացում այն մասին, թե իրականում ինչ է տեղի ունեցել, և ինչ է կատարվում Արցախից դեպի Սիրիայի արևելյան և հյուսիսային շրջաններ ընկած տարածքում:
Ամերիկյան պաշտոնատար անձանցից ո՞վ և ո՞ւմ հետ է քննարկել Արցախի դեմ ագրեսիան, և ինչո՞ւ են Ռուսաստանն ու Իրանը պասիվ արձագանքել դրան՝ միշտ և չափազանց հետաքրքրված լինելով, որ Այսրկովկասում պատերազմներ չլինեն, մենք այսօր հրապարակավ չենք քննարկի: Առայժմ արձանագրում ենք մեկ բան. ԱՄՆ-ը, Իսրայելը (ինչպես նաև Թուրքիան) սկսել են իրականացնել ռուսներին և իրանցիներին Արևելյան Սիրիայից վտարելու ծրագիր: Մաղթում ենք Մոսկվային և Թեհրանին լուռ «կուլ տալ» Ռուսաստանի և Իրանի հավերժական թշնամիների կողմից նաև այս ապտակը:
Սերգեյ Շաքարյանց
