Բրիտանական դատարանը դեկտեմբերի 10-ին որոշում կկայացնի Ասանժին ԱՄՆ արտահանձնման վերաբերյալ
Անգլիայի և Ուելսի վերաքննիչ դատարանը դեկտեմբերի 10-ին որոշում կկայացնի «Վիկիլիկսի» հիմնադիր Ջուլիան Ասանժին ԱՄՆ արտահանձնելու մասին։ Այս մասին հաղորդվում է դատարանի կայքում։ Գրում է interfax.ru-ն:
«ԱՄՆ կառավարությունն ընդդեմ Ասանժի» գործով որոշումը կհրապարակվի ուրբաթ օրը, ժամը 10:15-ին (Մոսկվայի ժամանակով 13:15-ին):
2021 թվականի հունվարին Վեստմինստրյան մագիստրոսական դատարանը մերժեց Ասանժին արտահանձնել Միացյալ Նահանգներին։ Դատարանը իր որոշումը պատճառաբանել է բանտարկյալի հոգեկան առողջության համար վախով։ Ավելի ուշ ԱՄՆ արդարադատության նախարարությունը բողոքարկել է որոշումը՝ պնդելով «Վիկիլիկսի» հիմնադրի արտահանձնումը։
Ասանժն այժմ գտնվում է Լոնդոնի Բելմարշ բանտում։
ԱՄՆ-ում նրա դեմ 18 քրեական մեղադրանք է առաջադրվել, որոնցով նրան սպառնում է մինչև 175 տարվա ազատազրկում։
Ինչում մեղադրվում է Ջուլիան Ասանժը
Նա ի սկզբանե ընկել է բրիտանական բանտ 2012 թվականի իրադարձությունների պատճառով։ Այն ժամանակ Ասանժին Շվեդիայում մեղադրեցին սեռական ոտնձգությունների մեջ, և Մեծ Բրիտանիան պետք է որոշեր նրա արտահանձնման մասին: Գրավի դիմաց ազատ արձակված Ասանժը չի ներկայացել դատարան և ապաստան է գտել Լոնդոնի Էկվադորի դեսպանատանը, որտեղ գտնվել է յոթ տարի։ Շվեդիայի իշխանությունները հետագայում փակեցին գործը։
2019 թվականի ապրիլին «Վիկիլիկսի» հիմնադիրը մեղավոր է ճանաչվել 2012 թվականին Վեստմինստրյան մագիստրոսական դատարանում դատարան չներկայանալու համար։ Այնուհետև Էկվադորի իշխանությունները թույլ են տվել բրիտանական ոստիկանությանը մուտք գործել դեսպանատուն և ձերբակալել «Վիկիլիկսի» հիմնադրին։ 2019 թվականի մայիսի սկզբին Մեծ Բրիտանիայի դատարանը Ասանժին 50 շաբաթով բանտարկեց։
2019 թվականի ապրիլին ԱՄՆ արդարադատության նախարարությունը հայտարարեց, որ մեղադրում է «Վիկիլիկսի» հիմնադրին այս կազմակերպության նախկին տեղեկատու Չելսի Մենինգի հետ դավադրության մեջ՝ պետական համակարգիչների ցանցերը կոտրելու նպատակով ռազմական գաղտնի փաստաթղթեր տարածելու համար։ Ավելի ուշ Միացյալ Նահանգների դատական համակարգը հայտարարեց «Վիկիլիկսի» հիմնադրի դեմ լրացուցիչ մեղադրանք առաջադրելու ևս 17 կետերով։