Ռուսաստանի շառաչուն ապտակը ՄԻԵԴ-ին և Եվրոպայի խորհրդին միասեռ ամուսնությունների գրանցման հարցում
Ինչպես անսխալ կանխատեսել ու վստահաբար գրել էինք, Ռուսաստանը չի ենթարկվի միասեռ ամուսնությունների գրանցման վերաբերյալ Մարդու իրավունքների եվրոպական դատարանի (ՄԻԵԴ) որոշմանը:
Պետդումայի նախագահ Վյաչեսլավ Վոլոդինը երեկ հայտարարել է, որ Ռուսաստանը մտադիր չէ կատարել միասեռ ամուսնությունների գրանցման վերաբերյալ Մարդու իրավունքների եվրոպական դատարանի (ՄԻԵԴ) որոշումը, քանի որ այն հակասում է երկրի Սահմանադրությանը: Համապատասխան հայտարարությունն ընդունվել է խորհրդարանի ստորին պալատի խորհրդի կողմից:
«Հուլիսի 13-ին Մարդու իրավունքների եվրոպական դատարանը Ռուսաստանից պահանջեց իրավական ընթացակարգ մտցնել միասեռ ընտանեկան հարաբերությունների ճանաչման համար,- ասել է Վոլոդինը:- Պետդումայի Խորհրդի բոլոր անդամները, իսկ նրանք ներկայացնում են տարբեր քաղաքական խմբակցություններ, ՄԻԵԴ որոշումը գնահատելիս միաձայն են: Սա մեզ խորթ «արժեքների» պարտադրում է: Մենք չենք կատարելու որոշումը` Սահմանադրությանը հակասող»:
Անցյալ ամռանն ընդունված ՌԴ Սահմանադրության փոփոխություններին համապատասխան` Հիմնական օրենքը ներառում է դրույթ, որն ամրագրում է «ամուսնության ինստիտուտը` որպես տղամարդու և կնոջ միություն»: Բացի այդ, ՌԴ Սահմանադրության 79-րդ հոդվածի նոր նորմի համաձայն, Ռուսաստանում չպետք է կատարվեն Ռուսաստանի Դաշնության միջազգային պայմանագրերի դրույթների հիման վրա ընդունված միջպետական մարմինների որոշումները հիմնական օրենքին հակասող մեկնաբանությամբ:
Ինչպես արդեն նշել ենք, ՄԻԵԴ-ը քննել է Ռուսաստանից եկած երեք միասեռ զույգերի բողոքը, որոնց մերժվել է ամուսնության գրանցումը: Դատարանը միաձայն որոշել է, որ ՌԴ-ում այդ զույգերի հարաբերությունները պաշտոնապես ճանաչելուց հրաժարվելը Մարդու իրավունքների եվրոպական կոնվենցիայի 8-րդ հոդվածի («Յուրաքանչյուր ոք ունի իր անձնական ու ընտանեկան կյանքի, բնակարանի և նամակագրության նկատմամբ հարգանքի իրավունք») խախտում է: ՄԻԵԴ-ը եզրակացրել է, որ Ռուսաստանը պարտավոր է իրավական հիմք ապահովել բողոքողների հարաբերությունների ճանաչման և պաշտպանության համար` համաձայն ներպետական օրենսդրության:
ՌԴ նախագահի մամուլի քարտուղար Դմիտրի Պեսկովն ավելի վաղ ասել էր, որ Ռուսաստանը չի կարող կատարել ՄԻԵԴ որոշումը, քանի որ այն խախտում է Ռուսաստանի Դաշնության Սահմանադրությունը:
Ավելի վաղ կատարված սոցիոլոգիական հարցումների արդյունքները վկայում են, որ ռուսաստանցիները պատրաստ չեն մոռանալ գենդերային դերերը: Հարցումները ցույց են տվել երկրի բնակչության պահպանողականությունը:
«Ռոմիր» հետազոտական հոլդինգի և GlobalNR հետազոտական ընկերության միջազգային հանրույթի կողմից անցած դեկտեմբերին ավարտված սոցիոլոգիական հետազոտության արդյունքների համաձայն, պարզվել է, որ Ռուսաստանը զարգացած երկրներից ամենապահպանողականներից մեկն է:
Հարցված ռուսաստանցիների 71% -ը կարծում է, որ տղաների և աղջիկների գենդերային ավանդական դերերը լավագույնս համապատասխանում են հասարակությանը. սա Չինաստանից հետո ամենաբարձր ցուցանիշն է այն երկրների շարքում, որտեղ կատարվել են հիշյալ հետազոտությունները:
Միևնույն ժամանակ, Ռուսաստանում հարցվածներն ամենաքիչն են համաձայն նույնասեռ զույգերի ամուսնության իրավունքի հետ և առավել բացասական են վերաբերվում տղամարդկանց կիսաշրջազգեստի գաղափարին:
Երկու ընկերությունների փորձագետներն ուսումնասիրել են աշխարհի մի քանի առաջատար և միաժամանակ ամենաբնակեցված երկրների՝ Բրազիլիայի, ԱՄՆ-ի, Հնդկաստանի, Չինաստանի, Ռուսաստանի, Մեծ Բրիտանիայի, Գերմանիայի, Իտալիայի, Թաիլանդի, Հարավային Կորեայի բնակիչների կարծիքը: Հարցվել է, ընդհանուր առմամբ, 7100 մարդ, որոնցից 800-ը`Ռուսաստանում:
Հարցման մասնակիցներին նախ խնդրել են պատասխանել «Տղաների և աղջիկների ավանդական գենդերային դերերն առավել համապատասխա՞նն են հասարակության համար» հարցին: Չինաստանում այս հարցին դրական է պատասխանել հարցվածների 82% -ը, Ռուսաստանում ՝ 71%-ը, Հնդկաստանում ՝ 69%-ը, Թաիլանդում ՝ 46%-ը, ԱՄՆ-ում`47%-ը, Գերմանիայում 24%-ը և Կորեայում 16%-ը:
Արթուր Հովհաննիսյան
