Դատախազը գտնում է, որ Քոչարյանի պաշտպանների կողմից ներկայացված միջնորդությունները խափանման միջոցը փոխելու վերաբերյալ անհիմն են և դրանք ենթակա են մերժման
Երևանի ընդհանուր իրավասության դատարանի Շենգավիթի նստավայրում այսօր ՀՀ երկրորդ նախագահ Ռոբերտ Քոչարյանի և մյուսների գործով դատական նիստում մեղադրող կողմը դատարանից խնդրեց մերժել փաստաբանական խմբի կողմից ներկայացված՝ Քոչարյանի խափանման միջոց կալանքը փոխելու վերաբերյալ 3 միջնորդությունները՝ կալանավորումն ընդհանրապես վերացնելու, գրավ կամ անձնական երաշխավորություն կիրառելու վերաբերյալ։ Դատախազ Պետրոս Պետրոսյանի պնդմամբ՝ չի վերացել գործի քննությանը խոչընդոտելու և թաքնվելու ռիսկը։
«Դատավարական առումով դեռ ոչինչ տեղի չի ունեցել, գործով որևէ դատավարական գործողություն չի իրականացվել, որևէ անձ դատարանում չի հարցաքննվել, քննությանը խոչընդոտելուն որևէ ռիսկ չի նվազել»,- ընդգծեց Պետրոսյանը։
Անդրադառնալով համաճարակային իրավիճակով Քոչարյանին ազատ արձակելու հիմքերին՝ դատախազը նշեց, որ միջազգային կառույցների կողմից հրապարակված սկզբունքներում չկա որևէ մատնանշում, որ պետությունները պարտավոր են ռիսկային խմբում գտնվող անձանց, համավարակով պայմանավորված, առանց հիմքերին անդրադառնալու՝ ազատ արձակել և կալանավորումը որպես խափանման միջոց չկիրառել։
Դատախազը գտնում է, որ Քոչարյանի պաշտպանների կողմից ներկայացված միջնորդությունները խափանման միջոցը փոխելու վերաբերյալ անհիմն են և դրանք ենթակա են մերժման։
Հիշեցնենք, որ ավելի վաղ Քոչարյանի փաստաբանական թիմը Քոչարյանի խափանման միջոց կալանքը փոխելու վերաբեյալ 3 միջնորդություն է ներկայացրել՝ կալանավորումն ընդհանրապես վերացնելու, գրավ կամ անձնական երաշխավորություն կիրառելու։ Նիստին ներկա էր Ռոբերտ Քոչարյանը, ով ժամանել էր «Իզմիրլյան» բժշկական կենտրոնից:
Քոչարյանը կալանքի տակ է 2019 թվականի հունիսի 25-ից։ Նա մեղադրվում է ՀՀ սահմանադրական կարգը տապալելու մեջ։
Գործով անցնում են նաև 2008-ին Զինված ուժերի գլխավոր շտաբի պետ Սեյրան Օհանյանը, 2008-ին ՀՀ պաշտպանության նախարարի տեղակալ Յուրի Խաչատուրովը և 2008-ին Հայաստանի նախագահի աշխատակազմի ղեկավար, Անվտանգության խորհրդի քարտուղար Արմեն Գևորգյանը։
