Նվազեցնել ֆիզիկական շփումն այլ անձանց հետ, աշխատանքը կատարել առցանց. ԱԺ նախագահի շրջաբերականը
ՀՀ ազգային ժողովի նախագահ Արարատ Միրզոյանը շրջաբերական է ուղղել պատգամավորներին և աշխատակիցներին՝ հորդորելով վերջին երկու շաբաթվա ընթացքում գործուղման մեկնած գործընկերներին հնարավորինս ինքնամեկուսանալ, նվազեցնել այլ անձանց հետ ֆիզիկական հաղորդակցությունը: Միրզոյանը շրջաբերականը հրապարակել է իր «Ֆեյսբուքի» էջում:
«Կորոնավիրուսի վարակի տարածման հավանականությունը նվազեցնելու, առողջապահության համակարգի արդյունավետությանը նպաստելու և վարակը հաղթահարելու գործում կարևոր է յուրաքանչյուրիս մասնակցությունը։ Ուստի հորդորում եմ, որ ելնելով հանրային առողջության նկատմամբ պատասխանատվությունից՝ ԱԺ պատգամավորները և աշխատակիցները հնարավորինս նվազեցնեն ֆիզիկական հաղորդակցությունը այլ անձանց հետ և իրենց աշխատանքային պարտականությունները կատարեն առցանց, իսկ վերջին երկու շաբաթվա ընթացքում գործուղման մեկնած կամ որևէ ռիսկային խմբի ներկայացուցչի հետ ֆիզիկական շփումներ ունեցած գործընկերները ժամանակավորապես հնարավորինս ինքնամեկուսանան»,-նշել է Միրզոյանը:
Նա կոչ է արել նաև խստորեն հետևել Առողջապահության նախարարության ցուցումներին, հաճախակի ախտահանել ձեռքերը և ձեռքերով հաճախ հպվող առարկաները, խուսափել դեմքին դիպչելուց, խուսափել զանգվածային միջոցառումներին մասնակցելուց։
«Միաժամանակ տեղեկացնում եմ, որ հաշվի առնելով մանկապարտեզներում և դպրոցներում դասապրոցեսի՝ վարակի կանխարգելմամբ պայմանավորված ժամանակավոր ոչ բնականոն ընթացքը, ԱԺ այն աշխատակիցների նկատմամբ, ովքեր մանկապարտեզ կամ տարրական դպրոց հաճախող երեխա ունեն և իրենք են հոգում այդ երեխայի խնամքը, աշխատանքային օրվա ընթացքում ողջախոհության սահմաններում կարճատև բացակայությունների համար կարգապահական տույժեր չեն կիրառվի»,-ասված է շրջաբերականում:
Հայաստանում այս պահին գրանցված է կորոնավիրուսի հաստատված 6 դեպք: Առաջին դեպքը գրանցվել էր մարտի 1-ին: Եվս 3 դեպքի մասին հայտնի դարձավ մարտի 11-ին, 2 դեպքի մասին՝ մարտի 12-ին: Մարտի 13-ին կրթական հաստատություններում դասերը դադարեցվել են:
