Թեև «նևրոզ» հոգեկան առողջության ամենատարածված խնդիրներից է, մեծամասնությունը չի դիմում մասնագետի. խորհուրդներ բժշկից
Նևրոտիկ խանգարումները հանրության մեջ առավել ընդունված է անվանել «նևրոզ»։
Դրանք սովորաբար զարգանում են սթրեսային կամ հոգետրավմատիկ իրադարձությունների հետևանքով․ առիթ կարող են դառնալ կյանքի ամենատարբեր իրավիճակները` ընտանեկան կամ աշխատանքային կոնֆլիկտներից մինչև կենցաղային կամ ֆինանսական խնդիրներ, միջանձնային բարդ փոխհարաբերություններից մինչև հարազատի կորուստ և այլն։
Թեև նևրոտիկ խանգարումը հոգեկան առողջության ամենատարածված խնդիրներից է, սակայն մեծամասնությունը չի դիմում մասնագիտական բուժօգնության։
Որոնք են հիմնական ախտանիշները․
- վախ, տագնապ, խուճապի հաճախակի զգացողություն
- կպչուն մտքեր, կպչուն վախեր կամ հիշողություններ
- հյուծվելիություն՝ ընդհուպ քրոնիկական հոգնածության վիճակի հասնող
- դյուրագրգռություն
- հուզական անկայունություն (հույզերի զսպման անհնարինություն)
- ճանաչողական խնդիրներ (հիշողության թուլացում, ուշադրությունը կենտրոնացնելու դժվարություններ, նոր նյութ յուրացնելու դժվարություն)
- դժվարություններ սոցիալական շփումներում
- քնի խանգարումներ
- ցածր ինքնագնահատական:
Գրեթե միշտ նևորտիկ խանգարումներն ուղեկցվում են մարմնական կամ վեգետատիվ ախտանիշներով․
- գլխացավ, գլխապտույտ, ականջներում խշշոց, հավասարակշռության խանգարումներ
- սրտխփոց, կրծքավանդակի շրջանում սեղմող ցավ
- զարկերակային ճնշման տատանումներ (հաճախ զարկերակային ճնշման բարձրացում)
- հևոց, օդի պակասի զգացողություն, կոկորդում օտար մարմնի զգացողություն
- ցավեր առանց հստակ տեղակայման
- թուլություն, գերքրտնություն, դող
- սեռական թուլություն
- հաճախամիզություն
- մարսողական համակարգի խանգարումներ:
Առանձին դեպքերում անձի մոտ նշված ախտանիշներից կարող է դիտվել մեկը կամ մի քանիսը։
Չնայած նևրոտիկ խանգարումները վտանգ չեն ներկայացնում մարդու կյանքի համար` դրանք բերում են կյանքի որակի անկման։
ժամանակին և համարժեք բուժման դեպքում նևրոտիկ խանգարումները լիովին ենթարկվում են առողջացման:
Խնդիրն անուշադրության մատնելու կամ ինքնաբուժմամբ զբաղվելու դեպքում մեծանում է հիվանդության քրոնիկական ընթացքի ձևավորման հավանականությունը։
ԱՆ խորհրդատու հոգեբուժության և բժշկական հոգեբանության գծով
