ԵՊՀ հոգաբարձուների խորհրդի նիստը կշարունակվի վաղը
Այսօր ԵՊՀ-ում հրավիրվել էր Մայր բուհի հոգաբարձուների խորհրդի նիստը։ Իշխանության ներկայացուցիչներից 15-ը խորհրդին իրենց անդամակցությունը դադարեցնելու դիմում էր ներկայացրել Նիկոլ Փաշինյանին, գործընկերների օրինակին չէր հետևել միայն Հայաստանի ֆոնդային բորսայի ՏՏ բաժնի ղեկավար Ավետիք Քերոբյանը։
Նրա առաջարկով Հոգաբարձուների խորհրդի այսօրվա նիստի օրակարգում ներառվեց երկու հարց` Հոգաբարձուների խորհրդի նախագահ ընտրելու և խորհրդից դուրս գալու դիմում ներկայացրած հոգաբարձուների անդամակցությունը վաղաժամ դադարեցնելու հարցերը։
ԵՊՀ կառավարման և գործարարության ամբիոնի վարիչ Կառլեն Խաչատրյանն առաջարկեց, որ խորհուրդը գոնե հայտարարության տեսքով անդրադառնա իշխանության ներկայացուցիչների` խորհրդի անդամակցությունից հրաժարվելուն, այս առաջարկը ևս ներառվեց օրակարգում։ ԵՊՀ ՈՒԽ նախագահ Դավիթ Ափոյանն էլ առաջարկեց օրակարգում ներառել հարց, որով ուժը կորցրած կճանաչվի Հոգաբարձուների խորհրդի որոշումը` լուծարել Ուսանողների հետ տարվող աշխատանքների կենտրոնը։
Օրակարգային հարցերից մեկով դրական գնահատվեց ռեկտորի պաշտոնակատարի` 2019-20 ուստարվա հաշվետվությունը և զարգացման ռազմավարական ծրագրով նախատեսված աշխատանքների կատարողականը։ Նիստին ներկա էր միայն 17 անդամ, հենց այդքան անդամ էլ հարկավոր էր քվորում ապահովելու համար։ Սակայն Անահիտ Չուբարյանը իր հարազատի վատառողջության պատճառով նիստին մասնակցում էր հեռավար, և նրա հետ կապ հաստատել չէր հաջողվում։ Ուստի առաջարկվեց նիստը հետաձգել քանի որ որոշումների կայացման համար հարկավոր է, որ լինի քվորում, ինչը չկա։
Հոգաբարձուների խորհրդի նիստը հետաձգվեց, կշարունակվի վաղը ժամը 17։00-ին։
