Ավտոբուսների վարորդները դեռ գործադուլ են անում. նրանց չկարողացավ համոզել նույնիսկ Ավինյանը
«Երեւան ավտոբուս» ՓԲԸ-ի աշխատակիցների եւ վարորդների բողոքի ակցիան շարունակվում է:
Հիշեցնենք, որ այսօր կեսօրից «Երեւան ավտոբուս» ՓԲԸ-ի աշխատակիցները եւ վարորդները բողոքի ակցիա են իրականացրել:
Վարորդները գործադուլ են արել եւ հայտարարել են, որ ունեն մեկ պահանջ, այն է` վերականգնել աշխատանքի գլխավոր ճարտարագետին` Անդրանիկ Մանուկյանին: նաեւ օրվա ընթացքում ստորագրահավաք է սկսվել նորանշանակ տնօրենին` Սամվել Նազարյանին աշխատանքից հեռացնելու պահանջով: Ըստ ակցիայի մասնակիցների գլխավոր ճարտարագետին անհիմն են ազատել: Ըստ վարոդների 15 տարի գլխավոր ճարտարագետ աշխատած Անդրանիկ Մանուկյանը շատ ջանք եւ ներդրում է ունեցել:
Օրվա ընթացքում վարորդներին եւ այլ աշխատակիցներին մոտեցավ Անդրանիկ Մանուկյանը եւ հորդորեց վերադառնալ աշխատանքի, քանի որ երթեւեկությունը կաթվածահար է, եւ ուղեւորները ժամերով սպասում են կանգառներում: Վարորդները մերժեցին` հայտարարելով, որչ միայն նրա աշխատանքի վերականգնելուց հետո կվերսկսեն աշխատանքը:
Երեկոյան ակցիայի վայր եկավ Երեւանի քաղաքապետ Տիգրան Ավինյանը, փոխքաղաքապետերը: Ավինյանը փոքր քննարկում ունեցավ նորանշանակ տնօրենի հետ, ապա մոտեցավ վարորդներին, սակայն նրանք հայտարարեցին, որ իրենց գլխավոր պահանջից չեն շեղվելու, այն է վերականգնել աշխատանքի գլխավոր ճարտարագետին:
Սակայն Ավինյանը հայտարարեց, որ Անդրանիկ Մանուկյանին աշխատանքի հետ չեն ընդունելու, քանի որ չարաշահումներ են եղել, ըստ Ավինյանի մոտ 4 միլիոն դրամի թերհավաքագրումներ են եղել, ինչին ի պատասխան վարորդները ասացին, որ դա Մանուկյանի հետ կապ չունի: Նշենք, որ Անդրանիկ Մանուկյանին Տիգրան Ավինյանը առաջարկել է արձակուրդի գնալ, իսկթե կվերականգնվի արձակուրդից հետո, պարզ չէ:
