ԵԽ 31 անդամներ կոչ են արել զրկել Վրաստանին թեկնածուի կարգավիճակից
Եվրախորհրդարանի 31 անդամներ դիմել են Եվրահանձնաժողովի փոխնախագահ և ԵՄ դիվանագիտության ղեկավար Ժոզեպ Բորելին՝ կոչ անելով կասեցնել Վրաստանի՝ որպես ԵՄ թեկնածուի կարգավիճակը, հաղորդում է SOVA նախագիծը։
Եվրախորհրդարանի անդամների կարծիքով, խաղաղ ցուցարարներին լռեցնելու և ուժ կիրառելու փորձերը «օտարերկրյա գործակալների» մասին օրենքի ռուսական անալոգի ընդունման գործընթացում դուրս են եկել թույլատրելիի սահմաններից։
«Մենք ձեզ կոչ ենք անում հաստատակամ դիրքորոշում ունենալ և համապատասխան միջոցներ ձեռնարկել, որոնք հստակ ազդանշան կուղարկեն Վրաստանի կառավարությանը։ Վրաստանի կառավարության և առաջատար «Վրացական երազանք» կուսակցության պահվածքը հակասում է ԵՄ թեկնածու երկրի պարտավորություններին։ Ըստ այդմ, Վրաստանի թեկնածուի կարգավիճակը պետք է դադարեցվի՝ առանց անդամակցության հետագա առաջընթացի»,- ասվում է խորհրդարանականների հայտարարության մեջ։
Երկրորդ՝ պատգամավորները կարծում են, որ անհրաժեշտ է վերանայել Եվրամիության կողմից Վրաստանի պետական բյուջեի և կառավարության ծրագրերի ֆինանսավորումը։
Խորհրդարանականները նաև ցանկանում են, որ անհապաղ իրականացվի Վրաստանի առաջընթացի միջանկյալ գնահատականը Եվրոպական հանձնաժողովի 2023 թվականի նոյեմբերի 8-ի հանձնարարականում նշված ինը քայլերի իրականացման հարցում:
Հայտարարության հեղինակներն են Ռասա Յուկնևիչիենեն, Անդրիուս Կուբիլիուսը, Միրիամ Լեքսմանը և Եվրախորհրդարանի ևս 28 պատգամավորներ։
