Հանրային տրանսպորտը 3-5 տարով կարող է լինել անվճար, բայց էս մարդիկ անպայման պետք է մտնեն քաղաքացիների գրպանը․ Վիկտոր Մնացականյան
Տրանսպորտի ոլորտը ամենանուրբ ոլորտն է և պետք է արվեին պիլոտային ծրագրեր: Այս մասին, այսօր՝ մարտի 12-ին, Երևանի քաղաքապետարանի դիմաց բողոքի ակցիայի ժամանակ նշեց Երևանի Կենտրոն վարչական շրջանի նախկին ղեկվար Վիկտոր Մնացականյանը՝ անդրադառնալով տրանսպորտի թանկացման նախաձեռնությանը:
«Իրենք անում են ընդամենը հասարակական տրանսպորտի վատթարացում, որովհետև այս մոդելով սա չի աշխատելու, ինչպես չաշխատեց կարմիր գծերի թանկացումը Կենտրոնում։ Կենտրոնի փողոցները չեն բեռնաթափվել, միայն ցերեկը որոշ ժամերի, որոշ փողոցներում է դա եղել: Կենտրոնում ունենք հարյուրավոր բակեր, որտեղ հնարավորություն չկա մեքենաները կագնեցնելու»,-ասաց նա:
Վիկտոր Մնացականյանի խոսքով, քաղաքային իշխանությունը որևէ բան չի մտածել հեծանվային ուղիների զարգացման մասին: Բացի այդ, ըստ նրա, մեծ քաղաքաշինություն է ընթանում Արշակունյաց պողոտայում. «Արդեն Արշակունյաց պողոտան կանգնած է, եթե այդ շենքերը շահագործման հանձնվեն, պողոտան տոտալ կանգնելու է:
Հարցին՝ հնարավո՞ր է որակյալ և նորմալ տրանսպորտ ունենալ Երևանում առանց ուղեվարձը թանկացնելու, նա պատասխանեց. «Որակյալի մասով կդժվարանամ պատասխանել, ավելի շուտ չի լինի: Ես ունեմ ներքին իմ համոզմունքը, որ Երևանի տրանսպորտը գոնե 3-5 տարով կարող է լինել անվճար, և մենք գումարի տեղն ասում ենք, բայց էս մարդիկ անպայման պետք է մտնեն քաղաքացիների գրպանը: Էլ չեմ ասում, որ միլիարդավոր վարկեր ենք վերցնել մեր ուսերի վրա, որը փակելու են մեր երեխաները»:
Նշենք, որ Երևանի ավագանին այսօր քննարկում է տրանսպորտի թանկացման հարցը:
Միասնական տոմսային համակարգի լրամշակված նախագծով նախատեսվում է ՝
«90 րոպե»-անոց տոմս – 280-300 դրամ՝ 3 ուղևորություն (յուրաքանչյուր տրանսպորտային միջոցում մեկ օգտագործման պայմանով),
1 օրվա համար 880-900 դրամ՝ 8 ուղևորություն (յուրաքանչյուր տրանսպորտային միջոցում մեկ օգտագործման պայմանով),
7 օրվա համար 8400-5000 դրամ՝ 30 ուղևորություն (յուրաքանչյուր տրանսպորտային միջոցում մեկ օգտագործման պայմանով),
30 օրվա համար 8800-9000 դրամ՝ անսահմանափակ երթևեկելու հնարավորությամբ։
90 օրվա համար 23 600-24 000 դրամ՝ անսահմանափակ երթևեկելու հնարավորությամբ։
365 օրվա համար 88 000-90 000 դրամ՝ անսահմանափակ երթևեկելու հնարավորությամբ,
«Բազմակի օգտագործման» տոմս – 2100-2200 դրամ՝ մեկ ամսվա ընթացքում 10 ուղևորություն,
Ցանկացած փաթեթ ձեռք բերելու դեպքում քաղաքացիները կարող են օգտվել հասարակական տրանսպորտի բոլոր միջոցներից։
Ուսանողների, բնակչության սոցիալական կամ հատուկ խմբերի համար կկիրառվեն զեղչեր:
Որոշումն ուժի մեջ կմտնի սեպտեմբերի 1-ից: