Թեհրանը բացատրություն է պահանջել Իսլամաբադից
Իրանի արտաքին գործերի նախարարությունը կանչել է Թեհրանում Պակիստանի գործերի ժամանակավոր հավատարմատարին։ Այս մասին հայտնում է իրանական «Երիտասարդ լրագրողների ակումբ» գործակալությունը։
Դիվանագետին կանչել են պարզաբանումներ ստանալու՝ կապված վերջերս Իրանի Սիստան և Բելուջիստան նահանգում թիրախների վրա Պակիստանի զինված ուժերի հարձակման հետ։
Թեհրանը բացատրություն է պահանջել Իսլամաբադից՝ Իրանում թիրախների վրա Պակիստանի ռազմաօդային ուժերի հրթիռային հարձակումների պատճառով։ Այս մասին Press TV-ին հայտնել է Իրանի անվտանգության ուժերի ներկայացուցիչը։
Նրա խոսքով՝ «Իրանը Պակիստանից անհապաղ բացատրություն է պահանջել Սիստան և Բելուջեստան նահանգի սահմանամերձ գյուղերից մեկի վրա իրականացրած հրթիռային հարձակումների վերաբերյալ»։
Պակիստանը հունվարի 18-ի վաղ առավոտյան՝ ժամը 4։30-ի սահմանում, հրթիռային հարվածներ է հասցրել Իրանի տարածքին։ Ինչպես գրում է France-Presse գործակալությունը՝ հղում անելով պակիստանցի պաշտոնյային, հրթիռային հարձակումն ուղղված էր «հակապակիստանյան խմբավորումներին»:
«Ես միայն կարող եմ հաստատել, որ մենք հարվածներ ենք հասցրել հակապակիստանյան գրոհայիններին Իրանում», – պաշտոնյայի խոսքն է մեջբերում գործակալությունը:
Ավելի վաղ Mehr գործակալությունը, վկայակոչելով Սարավանի նահանգապետի՝ անվտանգության ու իրավական հարցերով տեղակալ Ալիրեզ Մարհամաթիին, հայտնել էր, որ պայթյունների ձայներ են լսվել Իրանի հարավ-արևելքում՝ Պակիստանի հետ սահմանին գտնվող Սերավան նահանգի մի քանի շրջաններում։
Մարհամաթին նաև հայտնել է, որ Պակիստանի հրթիռային հարվածների հետևանքով Իրանի քաղաքացի չհանդիսացող յոթ մարդ է մահացել։ Ինչպես մանրամասնել է պաշտոնյան, զոհվել է երեք կին և չորս երեխա։
Պակիստանի ԱԳՆ-ն ավելի ուշ մեկնաբանել է Իրանին հարվածներ հասցնելու լուրը՝ նշելով, որ իրենք մի շարք ճշգրիտ հարվածներ են հասցրել Իրանում գտնվող «ահաբեկիչների թաքստոցներին», որոշ «ահաբեկիչներ» ոչնչացվել են։
Ըստ այդ երկրի ԱԳՆ հայտարարության՝ Պակիստանը տարիներ շարունակ անհանգստություն է հայտնել Թեհրանին այն առընչությամբ, որ Իրանի տարածքում «պակիստանյան ծագումով ահաբեկիչներ» են ապաստանում, սակայն Թեհրանը բավարար միջոցներ չի ձեռնարկել նրանց դեմ։
Հիշեցնենք, որ նախօրեին Իրանը հրթիռակոծել էր Պակիստանի հարավ-արևելյան սահմանը՝ «Ջեյշ ալ-Ադլ» ահաբեկչական խմբավորման բջիջը ոչնչացնելու նպատակով: Պակիստանը դատապարտել էր այդ քայլը, հետ էր կանչել Թեհրանում իր դեսպանին՝ խոստանալով համապատասխան միջոցներ ձեռնարկել:
