ՌԴ ներկայացուցիչը 1946-ից ի վեր առաջին անգամ չի ընդգրկվել Արդարադատության միջազգային դատարանի դատավորների կազմում
Ռուսաստանի ներկայացուցիչ Կիրիլ Գևորգյանը, որը 2015 թվականից Հաագայի միջազգային դատարանի դատավորն է, երկրորդ ժամկետով չի վերընտրվել։ Հինգշաբթի՝ նոյեմբերի 10-ին ՄԱԿ-ի Գլխավոր ասամբլեայում տեղի ունեցած քվեարկության ժամանակ նա պարտվել է Ռումինիայի ներկայացուցիչ Բոգդան-Լյուսիան Աուրեսկուին, որին աջակցել են Գլխավոր ասամբլեայի 117 անդամներ։
Խորհրդային և ռուս դատավորները ՄԱԿ-ի դատական համակարգում ծառայում են 1946 թվականից: Այսպիսով, առաջին անգամ Արդարադատության միջազգային դատարանում Ռուսաստանի ներկայացուցիչ չի լինի։
Բացի Աուրեսկուից, Արդարադատության միջազգային դատարանում ընտրվել են ևս երեք նոր դատավորներ՝ Սառա Հալլ Քլիվլենդը (ԱՄՆ), Խուան Վերդուզկոն (Մեքսիկա) և Դիրե Տլադին (Հարավային Աֆրիկա), և մեկ գործող դատավոր՝ Ավստրալիայի ներկայացուցիչ Հիլարի Չարլսվորթը, վերընտրվել է։
Արդարադատության միջազգային դատարանը բաղկացած է 15 դատավորից, որոնց պաշտոնավարման ժամկետը ինը տարի է։ Միաժամանակ երեք տարին մեկ ընտրություններ են անցկացվում թափուր հինգ տեղերի համար։ Մի քանի ժամկետ անընդմեջ ծառայելու արգելք չկա։
