Լյուիսթոնում տեղի ունեցած հրաձգությունը զոհերի թվով ԱՄՆ-ում 2023 թ․ ամենամեծ միջադեպն է
Լյուիսթոն քաղաքում տեղի ունեցած զանգվածային հրաձգությունը խլել է ԱՄՆ-ում 2023 թվականին հրազենային բռնության բոլոր դեպքերից ամենամեծ թվով կյանքեր՝ համաձայն Gun Violence Archive-ի (GVA) հրապարակված տվյալների, որը տեղեկություններ է հավաքում երկրում հրազենի կիրառմամբ բոլոր միջադեպերի մասին, փոխանցում է «ՌԻԱ Նովոստի»-ին։
Լյուիսթոնում տեղի ունեցած հրաձգության հետևանքով վերջին տվյալներով՝ 22 մարդ զոհվել է, ևս 60-ը՝ վիրավորվել։
Ըստ GVA-ի՝ մինչ այս ամենամեծ թվով կյանքեր խլած միջադեպը եղել է Կալիֆորնիայի Մոնտերեյ Փարկ քաղաքում, որտեղ հունիսին տեղի ունեցած հրաձգության հետևանքով զոհվել էր 11 մարդ:
Իրավապահները հայտնել են, որ Լյուիսթոնի հրաձիգը դեռևս ազատության մեջ է, «զինված է և վտանգավոր»։ Իրավապահները փորձում են պարզել զանգվածային հրաձգության մեջ կասկածվող Ռոբերտ Քարդի գտնվելու վայրը։
«ABC News»-ի փոխանցմամբ՝ Քարդը ծառայել է բանակում և աշխատել որպես հրազենի հրահանգիչ։ Նա հոգեկան առողջության հետ կապված խնդիրներ ուներ և այս ամառ երկու շաբաթ անցկացրել է հոգեբուժարանում այն բանից հետո, երբ իբր խոստացել էր հրաձգություն կազմակերպել Ազգային գվարդիայի հաստատությունում։
