Արցախից բռնի տեղահանված 76 692 մարդ գտնվում է Հայաստանի տարբեր մարզերում
Արցախից բռնի տեղահանված շուրջ 100 632 անձ է ժամանել ՀՀ և ներկա փուլում իրականացվում է տվյալների հաշվառման և նույնականացման գործընթացը։ Այս մասին այսօր՝ հոկտեմբերի 7-ին, «Հումանիտար կենտրոն»-ի կողմից ցուցաբերվող աջակցության աշխատանքների ընթացքը ներկայացնելիս ասաց վարչապետի մամուլի քարտուղար Նազելի Բաղդասարյանը։
Ըստ Քաղաքացիության և միգրացիայի ծառայության տրամադրած թվերի, այս պահի դրությամբ 99.3 տոկոսի տվյալները մշակված են, նրանք հաշվառված և նույնականացված են:
«Տեղաբաշխումը շարունակվում է ինչպես ՀՀ մարզերում, այնպես էլ Երևանում։ Որոշ դեպքերում առաջնային կեցավայր մեկնածներն այժմ տեղափոխվում են ավելի հարմար բնակավայրեր, որպեսզի առաջիկա 6 ամսում արդեն վարձակալած բնակավայրերում շարունակեն ապրել», – ասաց նա։
Այսօրվա դրությամբ 76 692 մարդ գտնվում է Հայաստանի տարբեր մարզերում։
«Ընդհանուր ժամանածներից շուրջ 58 հազար հոգու տեղավորման և կեցության հարցում աջակցել է պետությունը։ Մյուսների դեպքում տրամադրվել են որոշակի սնունդ, հիգիենիկ պարագաներ, դեղորայք»,- ասաց մամուլի խոսնակը։
Նա հայտնեց, որ գումարների փոխանցման գործընթացը կշարունակվի երկուշաբթի օրվանից:
