Արցախից ավելի քան 100 բռնի տեղահանված տեղավորվել է Արտաշատի մարզադահլիճներից մեկում
Արցախից բռնի տեղահանված մոտ 120 անձ ժամանակավոր տեղավորվել է Արտաշատ քաղաքի մարզադահլիճներից մեկում, որտեղ բացակայում են կենցաղային տարրական պայմանները։
Այս մասին «Արցախպրես»-ի թղթակցի հետ զրույցում տեղեկացրեց Մարիաննա Բաղրյանը, ով 2020 թվականին Ադրբեջանի սանձազերծած պատերազմի հետևանքով տեղահանվել է Արցախի Ավետարանոց համայնքից, իսկ այժմ Ստեփանակերտից է մոր հետ մի կերպ հասել Արտաշատ։
«Այստեղ տեղավորվել են այն մարդիկ, ովքեր անելանելի վիճակում էին հայտնվել՝ կամ գնալու տեղ չունեին, կամ արդեն հոգնել էին մեքենան վարելուց և դիմել են Արտաշատի համայնքային իշխանություններին իրենց տեղավորելու համար։ Նրանք միջամտել են և իրենց հնարավորության սահմաններում մեզ տեղավորել, կամավորներն էլ օգնում են ամեն ինչով, որի համար շնորհակալ ենք։ Այդուհանդերձ, երկար մնալու համար բացակայում են պայմանները․ մահճակալները կողք-կողքի են դրված, մինչդեռ այստեղ գիշերում են և կանայք, և երեխաներ, և տղամարդիկ։ Համայնքապետարանից հավաստիացրել են, որ այս ժամանակավոր կացարանում կարող ենք մնալ այնքան ժամանակ, մինչև տուն գտնենք, բայց դրանց անընդհատ աճող վարձավճարների պայմաններում չգիտենք, թե ինչ ենք անելու»,-մանրամասնեց Բաղրյանը։
