Հռոմի ստատուտը վավերացնելով՝ Հայաստանն արգելում է Վլադիմիր Պուտինի մուտքը երկիր․Կոնստանտին Զատուլին
Հայաստանի խորհրդարանի կողմից ՄՔԴ-ի Հռոմի կանոնադրության վավերացումը փաստացի նշանակում է Ռուսաստանի նախագահ Վլադիմիր Պուտինի՝ Հայաստան մուտքի արգելք։ Այս մասին Գազետա-ի հետ զրույցում ասել է ՌԴ Պետդումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահի առաջին տեղակալ Կոնստանտին Զատուլինը։
«Հայաստանը փորձում է նսեմացնել ՄՔԴ-ի Հռոմի կանոնադրության վավերացման նշանակությունը։ Հայկական կողմը պնդում է, որ չի պատրաստվում դա կիրառել Ռուսաստանի պետական պաշտոնյաների նկատմամբ։ Մյուս կողմից՝ մենք պաշտոնապես դատապարտեցինք այս վավերացումը՝ որպես ոչ բարեկամական քայլ։
Առաջիկայում Ռուսաստանի Դաշնության նախագահի Հայաստան մեկնելու հեռանկար՝ վավերացումով կամ առանց վավերացման, չեմ տեսնում։ Տվյալ դեպքում հայկական կողմը չի կարող չհասկանալ, որ նման գործողություն իրականում նշանակում է ՌԴ նախագահի՝ Հայաստան մուտքի արգելք։ Այս առումով Փաշինյանը և իր գործընկերները հետևողական են»,-ասել է նա։
Զատուլինը հիշեցրել է, որ Հայաստանն արդեն արգելել է Մարգարիտա Սիմոնյանի և Արամ Գաբրիելյանովի, ինչպես նաև «մի շարք այլ անձանց» մուտքը երկիր։
«Ռուսաստանի նախագահի դեպքում, իհարկե, դժվար կլինի արգելել մուտքը երկիր, բայց կասկածի տակ դնել, կասկած սերմանել, որ դա նույնիսկ իրագործելի է, այն է, ինչ տեղի ունեցավ Հռոմի ստատուտի վավերացման արդյունքում»,-նշել է Զատուլինը։
