Մարդկային դեմքը կորցրած մի քանի հարյուր «հայ» ոստիկաններ, չեն կարող խոչընդոտել ազգային շարժմանն ու զարթոնքին. Արտակ Զաքարյան
Արտակ Զաքարյանը ֆեյսբուքյան իր էջում գրում է.
«Մարդկային դեմքը կորցրած մի քանի հարյուր «հայ» ոստիկաններ, չեն կարող խոչընդոտել ազգային շարժմանն ու զարթոնքին: Ինչպես տեսնում ենք, նրանք հաճույքով անցնում են վայրենությունների, երբ քիչ քանակով մարդկանց խումբ է լինում: Մեծ խմբերի ակցիաներին նույնիսկ չեն մոտենում: Սրանք այն տեսակն են, որ նախընտրում են խմբով հարձակվել քաղաքացու վրա, և աշխատավարձ ստանալիս չմտածել, որ իրենք ծեծել և ձերբակալել են երիտասարդ մարդկանց, ում ծնողները, հարազատները, ընկերները այդ պահին սպանվում, հայրենազրկվում ու արմատախիլ են լինում: Նրանք փող (փարա, մանաթ) ստանալիս չեն մտածելու, որ հայության ոտատակ տված արժանապատվությունը փրկելու փորձեր անող մարդկանց են ձերբակալել: Չեն հասկանում, որ մի քանի տարի հետո, Երևանի փողոցներում, ոստիկաններով վազելու են, որպեսզի վնասազերծեն իրենց կանանց ու երեխաներին ծեծող և պատիվն արատավորող ադրբեջանա-թուրքական ագրեսիվ խմբերին:
Իրականում բազմաթիվ ոստիկաններ, որոնք անցել են արցախյան պատերազմներով, որոնք մասնակցել են Հայաստանի սահմանների պաշտպանությանը, որոնք իսկական հայ մարդիկ են, ազգային նամուս ու թասիբ ունեն` մեր ժողովրդի հետ ողբում են կատարված ցեղասպանության համար, ամաչում են Արցախին դավաճանած նիկոլ տեսակին ծառայելու համար, թաքնված նողկանք են ապրում այս վիճակին հասցնողներից: Նրանք ազնիվ ու պարկեշտ հայ մարդիկ են, որոնք Հայրենիքին տված երդմամբ` ծառայում են ոստիկանության շարքերում: Նրանք ոգով ու մտքով միացել են արժանապատիվ ժողովրդին, որովհետև պատիվ ունեն»:
