Աշխարհի թերևս բոլոր երկրների իշխանությունները, ներառյալ՝ Հայաստանի, գիտեն այդ մասին, բայց լռում են (տեսանյութեր)

Ինչ է նկատվել Բաքվի երկնքում հուլիսի 5-ի վաղ առավոտյան

 

Բաքվի երկնքում հուլիսի 5-ին նկատված այս դեպքն իրականներից է, այսինքն՝ հորինվածք չէ, ֆոտոմոնտաժով կամ այլ կերպ սարքված կեղծիք չէ:

Խոսքը նաև միրաժի՝ օդատեսիլի, օդերևույթի, օդապատկերի, կրկներևույթի, մթնոլորտում օպտիկական ինչ- որ երևույթի մասին չէ, այլ ֆիզիկապես գոյություն ունեցող չճանաչված կամ չբացահայտված թռչող օբյեկտի (ՉԹՕ-ի), ավելի ճիշտ, այսպես կոչված, «թռչող ափսեի»: Հրապարակված տեղեկություններից դատելով, Բաքվի երկնքում նկատվածը, ամենայն հավանականությամբ, արտերկրային ծագում ունեցող տիեզերանավ է եղել, քանի որ այն թռչել, երկնքում շարժվել է ոչ հրթիռային, երկրային տեխնոլոգիաների կողմից չստեղծված շարժիչով (հավանաբար հակագրավտացիոն):

Ադրբեջանական ԶԼՄ-ները հուլիսի 5-ին տեղեկացրել են Բաքվի երկնքում նկատված սկավառակաձև ՉԹՕ-ի մասին։

«Հուլիսի 5-ին, առավոտյան ժամը 7-ին մայրաքաղաքի երկնքում նկատվել է չբացահայտված թռչող օբյեկտ (ՉԹՕ)։ Իր առանցքի շուրջը պտտվող ափսեի տեսք ունեցող օբյեկտը թռել է հյուսիսից հարավ։ Պտտվելիս օբյեկտից պայծառ լույս է արձակվել»,- նշել է «Թուրան» գործակալությունը։

Հաղորդվում է նաև , որ Բաքվի երկնքում ՉԹՕ-ն նկատվել է երկրաշարժից հետո: Մենք ճշտեցինք , որ հուլիսի 3-ի ուշ երեկոյան Ադրբեջանում իսկապես ուժեղ երկրաշարժ է եղել, Բաքվում զգացվել են ուժեղ ցնցումներ, քաղաքի բնակիչները նույնիսկ սկսել են լքել իրենց տները: Ինչպես հայտնել են սեյսմոլոգները, Ադրբեջանի ափերի մոտ 5,4 մագնիտուդով (այսինքն՝ 7-7,5 բալանոց) երկրաշարժ է տեղի ունեցել: Երկրաշարժի էպիկենտրոնը գտնվել է Կասպից ծովում, օջախը՝ 35 կմ խորության վրա:

Վերոնշյալ երկու իրադարձությունները (երկրաշարժը և մոտ օրուկես հետո ՉԹՕ-ի հայտնվելը) արդյոք իրար հետ կապվա՞ծ են, թե ոչ, դժվար է ասել, հավանաբար կապված չեն:

Այնուհանդերձ, դժվար թե պատահականություն լինի «թռչող ափսեի» հայտնվելը Բաքվի երկնքում, այն պետք է, որ ինչ- որ կարևոր բանի հետ կապված լինի: Կան տեղեկություններ այն մասին, որ ՉԹՕ- ներ են հայտնվել այնտեղ և այն ժամանակ, որտեղից և երբ մարդկությանը Երրորդ համաշխարհային պատերազմի վտանգ է սպառնացել:

 

ԱՄՆ Սթենֆորդի համալսարանի գիտնական Նոլանի հայտարարությունը. այլմոլորակայիններն այցելել են Երկիր

Ըստ Սթենֆորդի համալսարանի գիտնական- իմունաբան Հարի Նոլանի, մարդիկ, հավանաբար, հանդիպել են նրանց՝ այլմոլորակայիններին, բայց ոչ մի արտառոց բան չեն նկատել, այսինքն՝ նրանք ունեցել կամ ձեռք են բերել մարդկային կերպարանք:

Նոլանը «Պենտագոն, արտերկրային բանականություն և աղետի ենթարկված ՉԹՕ-ներ» համաժողովի ընթացքում վստահություն է հայտնել, որ այլմոլորակայիններն արդեն այցելել են Երկիր և նախկինի պես գտնվում են մոլորակի վրա: Այս մասին, ТАСС-ի փոխանցմամբ, ս. թ. մայիսի 28-ին հայտնել է «Daily Mail» պարբերականը։

Պարբերականի տվյալներով՝ Նոլանը «հարյուր տոկոսանոց» է անվանել հավանականությունը նրա, որ այլմոլորակայիններն արդեն այցելել են երկիր, և նույնիսկ ենթադրել է, որ մարդիկ, հավանաբար, հանդիպել են նրանց, բայց ոչ մի արտառոց բան չեն նկատել:

«Նրանք (այլմոլորակայինները) հայտնվում են և ասում, թե ձեզանից ով է բավականաչափ խելացի, որպեսզի հասկանա, թե ինչին է նայում»,- գիտնականի խոսքն է մեջբերել «Daily Mail»-ը: Նոլանը նաև հայտարարել է, որ իր եզրակացություններն արել է «ելակետային տվյալների հավաքագրմամբ» զբաղվող մարդու հետ շփման հիման վրա, ինչպես նաև նրանց, ովքեր աշխատում են «կործանված թռչող սարքերի հակառակ նախագծման» վրա:

Հարի Նոլանը Սթենֆորդի համալսարանի իմունոլոգ է, Նոբելյան մրցանակի հավակնորդ: Նա փորձեր է անցկացրել՝ վերլուծելու այն նյութերը, որոնք ենթադրաբար դուրս են նետվել ՉԹՕ-ների այցերի ժամանակ:

Բացի վերոնշյալից, Նոլանը ԿՀՎ-ում զբաղվել է, այսպես կոչված, Հավանայի համախտանիշի ուսումնասիրությամբ, որից վերջին տարիներին տառապում էին հարյուրավոր ամերիկացի պետծառայողներ, և որը բնութագրվում է սրտխառնոցի, գլխացավի և գլխապտույտի նոպաներով: Ենթադրվում էր, որ «ԱՄՆ հակառակորդները» ուղղորդված էներգիա «են օգտագործել տուժածների դեմ, սակայն 2022 թվականին ԱՄՆ ազգային հետախուզության տնօրենի աշխատակազմն այդ վարկածն անվանել է «շատ քիչ հավանական»։

 

Ինչի մասին է հուշում վերջին շրջանում ՉԹՕ-ների մասին հաղորդագրությունների կտրուկ աճը

Ավելի վաղ ԱՄՆ-ի հետախուզությունը հայտնել է, որ ավելի քան 500 նոր հաղորդագրություն է ստացել ՉԹՕ-ների մասին: 2022թ. օգոստոսից ի վեր, Միացյալ Նահանգներում ՉԹՕ-ների հայտնաբերման ավելի քան 500 դեպք է գրանցվել. «Интерфакс» գործակալության փոխանցմամբ , այս մասին նշված է ԱՄՆ-ի ազգային հետախուզության տնօրենի գրասենյակի զեկույցում։

Ըստ զեկույցի՝ հայտնաբերված երևույթների կեսից ավելին ունեն «ոչնչով աչքի չընկնող բնութագրեր»: Դրանցից 26-ը բնութագրվել են որպես անօդաչու թռչող սարքեր (ԱԹՍ), 163-ը՝ որպես «օդապարիկներ կամ օբյեկտներ, որոնք նման են օդապարիկների»: Մի քանի այլ հաղորդագրություններ կապված են եղել թռչունների, եղանակային երևույթների կամ օդում գտնվող աղբի հետ, ինչպիսիք պլաստիկե տոպրակներն են: Դրա հետ մեկտեղ, 171 երևույթի մասին ԱՄՆ կառավարությունն այդպես Էլ չի կարողացել բացատրություն գտնել։

«Այս չբացահայտված անոմալ երևույթներից (UAP) մի քանիսը ցուցադրել են արտասովոր թռիչքային բնութագրեր կամ շահագործման հնարավորություններ և պահանջում են հետագա վերլուծություն», – նշված է զեկույցի մեջ:

Նույն փաստաթղթի համաձայն, ՉԹՕ- ների մասին նոր հաղորդագրությունների մեծ մասը ստացվել է ԱՄՆ-ի ռազմաօդային և ռազմածովային ուժերի օդաչուներից ու օպերատորներից, «որոնք չբացահայտված անոմալ երևույթների ականատեսն են եղել իրենց օպերատիվ պարտականությունները կատարելու ընթացքում»: 2022թ. դեկտեմբերի 12-ին հրապարակված վերոնշյալ զեկույցը ցույց է տվել գրանցված նմանաբնույթ միջադեպերի թվի կտրուկ աճ 2021թ. համանման զեկույցի հրապարակումից ի վեր:

Աճը, ըստ զեկույցի, բացատրվում Է նրանով, որ «ավելի լավ են գիտակցվում հնարավոր սպառնալիքները, որ ՉԹՕ-ն կարող է ներկայացնել կա՛մ թռիչքների անվտանգության համար, կա՛մ որպես հնարավոր հակառակորդի կողմից տվյալների հավաքման հարթակ»: Իբր թե ավելի վաղ էլ են դրանք շատ եղել, բայց բոլորը չէ, որ զեկուցվել են հրամանատարությանը և գրանցվել: Իրականում պատճառը դա չէ…

ՉԹՕ-ների մասին օդաչուների և այլոց հաղորդումների թիվն աճել է, քանի որ աճել է հենց ՉԹՕ- ների ի հայտ գալու քանակը, իսկ վերջինս աճել է, որովհետև 2022 թվականից սկսվեց ու գնալով թափ առնելով շարունակվում է այն պատերազմը, որը կարող է վերածվել միջուկային զենքի կիրառմամբ Երրորդ համաշխարհային պատերազմի, հետևաբար վտանգ է ներկայացնում ողջ մարդկության համար:

Զեկույցում նշված է նաև, որ Պենտագոնը և հետախուզական  գործակալությունները «կշարունակեն հետաքննել ՉԹՕ-ների երևույթներին օտարերկրյա կառավարության հնարավոր առնչության ցանկացած ապացույց»: «The Guardian» պարբերականն իր հերթին նշել է, որ զեկույցի հրապարակումից առաջ Կոնգրեսը տարիներ շարունակ պնդում էր, որ ռազմական և հետախուզական համայնքները լրջորեն վերաբերվեն ՉԹՕ կոչվածներին:

ԱՄՆ զինված ուժերը անհանգստացած են, որ նախկինում ռազմական օդաչուների կողմից նկատված որոշ չբացահայտված անոմալ երևույթներ կարող են լինել ռազմավարական մրցակիցների (ՌԴ- ի և Չինաստանի) տեխնոլոգիաներ, որոնք ծանոթ չեն ամերիկացի գիտնականներին: Թեև դա 100 տոկոսով հնարավոր չէ բացառել, սակայն առկա տեղեկությունները, բազմաթիվ փաստեր հուշում են, որ օդաչուների և այլոց նկատած ու բացատրություն չստացած ՉԹՕ-ներն արտերկրային ծագում ունեն, իսկ դրանց՝ ռազմավարական մրցակիցների անծանոթ տեխնոլոգիաների հնարավոր արգասիք լինելու մասին Պենտագոնի ենթադրությունները հավանաբար բնակչության շրջանում խուճապից խուսափելու նպատակ ունեն:

 

Вау-сигнал

ԱՄՆ-ի Օհայո նահանգի համալսարանի «Մեծ ականջ» ռադիոաստղադիտակով 1977թ. օգոստոսի 15-ին գրանցված 72 վայրկյան տևողության, առ այսօր չկրկնված, բացառիկ և ուժեղ ռադիոազդանշանը  բազմաթիվ գիտնականների կողմից համարվում է արտերկրային քաղաքակրթության կողմից ուղարկված ու նրա գոյության ապացույց, թեև այս առումով գիտնականների կարծիքներն իրարամերժ են: Այս մասին է «Вау-сигнал» փաստագրական ֆիլմը

Գիտնականները հասկանում են, որ իրենց հետազոտությունները կարող են խուճապ առաջացնել բնակչության շրջանում և հանգեցնել գլոբալ հետևանքների, ընդմիշտ փոխել տիեզերքի մասին մեր պատկերացումները, գիտելիքներն ու ըմբռնումը և, ի վերջո, մեր կյանքը, բայց չեն հանձնվում ու շարունակում են ուսումնասիրել ազդանշանը:

Այս ֆիլմը պատմություն է այն մասին, որ մենք տիեզերքում մենակ չենք, և որ կարող ենք կապ հաստատել այլ քաղաքակրթությունների հետ: Այս ֆիլմը պատմություն է նաև այն մասին, որ մենք պետք է պատրաստ լինենք փոփոխությունների և նոր հայտնագործությունների, որոնք կարող են ընդմիշտ փոխել մարդկության կյանքը:

Ֆիլմից դուրս. առ այսօր ձեռք բերված, կուտակված տեղեկություններն առնվազն հուշում են, որ արտերկրյա քաղաքակրթությունների հետ կապ հաստատելու և տիեզերքի, դրանում մարդկության տեղի ու դերի մասին մեր գիտելիքներն ընդլայնելու միակ հնարավորությունը ռադիոազդանշանները և ռադիոկապը չեն: Ամբողջ խնդիրը, սակայն, այն է, թե մարդկության հետ (և ոչ թե նրա առանձին ներկայացուցիչների…) երբ կցանկանան կապ հաստատել իրենք՝ այլմոլորակայինները, և կցանկանա՞ն, արդյոք, ընդհանրապես…

 

Արթուր Հովհաննիսյան