ՀՀ փաստաբանների պալատը հյուրընկալել է ՌԴ փաստաբանական համայնքի մի շարք ներկայացուցիչների
ՀՀ փաստաբանների պալատի նախագահ Սիմոն Բաբայանի հրավերով Պալատում հյուրընկավել են Երևանում կայացած միջազգային իրավական համաժողովի մասնակից փաստաբանները:
Ինչպես տեղեկացրին ՀՀ փաստաբանների պալատից, հյուրերի կազմում էին Լենինգրադի մարզի փաստաբանների պալատի նախագահ Դենիս Լակտիոնովը, Սանկտ Պետերբուրգի փաստաբանների պալատի նախագահի տեղակալ Ռուշան Չինոկաևը և Ռուսաստանի փաստաբանական համայնքի մի շարք ներկայացուցիչներ:
«Հանդիպման սկզբում հյուրերը շրջեցին ՀՀ փաստաբանների պալատի վարչական շենքում, հանդիպումներ ունեցան ՀՀ փաստաբանական ակադեմիայի ռեկտոր Արա Զոհրաբյանի և Հանրային պաշտպանի գրասենյակի ղեկավար Գևորգ Մկրտչյանի հետ:
Այնուհետև Փաստաբանների պալատի մեծ դահլիճում երկու երկրների գործընկերները քննարկեցին համատեղ գործընկերային հարաբերությունները և փաստաբանությանն առնչվող մի շարք առանցքային հարցեր»,- ասվում է հաղորդագրության մեջ:
Ըստ աղբյուրի՝ Սիմոն Բաբայանն ու Արա Զոհրաբյանը պատասխանել են հյուրերի ամենատարբեր հարցերի՝ ապահովելով փորձի փոխանակում և բովանդակային զրույց, ինչպես նաև ներկայացրել են ոլորտին առնչվող առկա մարտահրավերները և դրանց հաղթահարման նպատակով հայ փաստաբանների կողմից կիրառվող մեխանիզմները:
Հանդիպման ավարտին ռուս գործընկերները շնորհակալություն են հայտնել ջերմ ընդունելության և արդյունավետ քննարկում անցկացնելու համար:
