Գրիգորի Խաչատուրովի կալանքի ժամկետը լրացել է, դատարանն ապօրինի կերպով նրան պահում է անազատության մեջ․ պաշտպան

«Հենց հիմա դատական նիստերի դահլիճում դատավոր Գրիգորյանը հանցագործություն է կատարում։ Մեր կողմից փորձ կատարվեց կանխել այդ հանցագործությունը, վերջինս որոշեց, որ այդ հանցագործությունից թաքնվելու միակ տարբերակը ինձ վարույթից հեռացնելն է»,- Հակակոռուպցիոն դատարանի մոտ լրագրողներին ասաց գեներալ-մայոր Գրիգորի Խաչատուրովի պաշտպաններից Միհրան Պողոսյանը։

Նա մանրամասներ ներկայացրեց, թե ինչ է տեղի ունեցել փակ նիստի ընթացքում. «Գրիգորի Խաչատուրովը ժամը 16։45-ից հանդիսանում է ազատ մարդ, այսինքն կալանքի որոշման ժամկետը լրացել է, դատարանն ապօրինի կերպով մարդուն պահում է անազատության մեջ այն պարագայում, երբ  կալանքի վերաբերյալ դատարանի որոշում առկա չէ։

Այսինքն, հենց հիմա անձն ազատ քաղաքացի է  հանդիսանում,  կալանավորումը որպես խափանման միջոց ընտրված չէ, դատարանին  դրա կապակցությամբ  մատնանշում կատարելուց հետո և պահանջելով, որպեսզի դատարանն ազատ արձակի և ոստիկաններին դուրս հրավիրի դատական նիստերի դահլիճից, դատարանը որոշեց, որ Գրիգորի  Խաչատուրովն այս պահին ևս կալանքի տակ է առանց դատարանի որոշման։ Անձին ապօրինի արգելանքի տակ պահելը կլասիկ հանցագործություն է, որը նախատեսված է Քրեական օրենսգրքով»,- ասաց փաստաբանը։

Նա հայտարարեց, որ այս պարագայում Գրիգորի Խաչատուրովը դատավոր Գրիգորյանի մոտ գտնվում է պատանդի  կարգավիճակում, որովհետև գոյություն չունի դատական որոշում, որով նրան կարող են պահել  կալանքի տակ և այդ գործողությունները բարձրաձայնելու հետևանքով իրեն դատական նիստերի վարույթից հեռացրել են առանց պատճառաբանելու, թե ինչ կարգապահական խախտում եմ թույլ տվել։