Արյան աճուրդ։ Պատվի sale։ Հայրենիքի распродажа
ՀՀԿ փոխնախագահ Արմեն Աշոտյանը ֆեյսբուքյան էջում գրում է․
«Սա գերմանական Ռեյխստագի հարևանությամբ տեղադրված հուշարձանն է՝ նվիրված 1933-1945 թվականներին նացիստական Գերմանիայում սպանված 96 պատգամավորներին, որոնք 1933 թվականին դեմ էին Հիտլերին Գերմանիայի կանցլեր ընտրելուն։
Իսկ Հայաստանում ուղիղ հինգ տարի առաջ, 2018 թավականի մայիսի 1-ին Ազգային Ժողովի 55 պատգամավորներ դեմ քվեարկեցին Նիկոլ Փաշինյանի վարչապետությանը և դարձան ուղղորդված ատելության, անձնական թիրախավորման, արժանապատվության ոտնահարման, տների վրա հարձակման զոհ։
Հետո 55-ից ոչ բոլորը դիմացան։ Ոմանք լքեցին մեզ։ Ոմանց ստիպեցին հեռանալ Հանրապետականից։ Ոմանք որոշեցին դադարեցնել պայքարը։
Մնացածը մինչև վերջ մնացին անկոտրում։
Ես և իմ ընկերները, անկախ սպառնալիքներից, հետապնդումներից, ատելության և անհանդուրժողականության ուղղորդված արշավներից, մեր հանդեպ գործած բոլոր ստորություններից և անբարոյականություններից շարունակեցինք մեր ճանապարհը՝ հանուն ազատության և արժանապատվության։
Երկիր ու սերունդ կորցրեցինք։
Պատիվ և պատմություն։
Տղերք և հող։
Կյանք և հայրենիք։
Այսօր նորահայտ կույսերի և հանրահայտ պոռնիկների, անուղեղ մարմինների և անմարմին ուղեղների սնափառության տոնավաճառ է։
Արյան աճուրդ։ Պատվի sale։ Հայրենիքի распродажа։
Ու հենց այսօր, հինգ տարի անց, ուզում եմ նորից պարզ ճակատով և շիտակ կրկնել.
ՀՊԱՐՏ ԵՄ, ՈՐ ՀԱՆՐԱՊԵՏԱԿԱՆ ԵՄ»