Մենք որևէ կերպ չենք փորձում օժանդակել մեր ռուս գործընկերներին՝ սանկցիաները շրջանցել. Վահան Քերոբյան
«Հիմնական շարժառիթն այն է, որ Հայաստանը Ռուսաստանի հետ գտնվում է նույն մաքսային և տնտեսական գոտում, ինչը նշանակում է, որ ապրանքների տեղաշարժը երկրների միջև ազատ է»,- կառավարության դիմաց կազմակերպած ճեպազրույցի ժամանակ հայտարարեց էկոնոմիկայի նախարար Վահան Քերոբյանը՝ մեկնաբանելով արգելված ապրանքները Հայաստանի միջոցով ՌԴ-ին վաճառելու մասին ԱՄՆ-ի հայտարարությունը:
Նախարարը հայտնեց, որ հայկական կողմը խոսում է ամերիկյան և եվրոպական գործընկերների հետ, բացատրում այդ հանգամանքը, որպեսզի հայկական ընկերությունները չընկնեն պատժամիջոցների տակ:
«Մենք որևէ կերպ չենք փորձում օժանդակել մեր ռուս գործընկերների կողմից սանկցիաների շրջանցմանը»,- հայտարարեց Քերոբյանը՝ շեշտելով, որ փորձում են իրենց աշխատանքով պահպանել ԵԱՏՄ-ի հետ պայմանագրի դրույթները, բայց նաև այնպես անել, որ Հայաստանի ընկերությունները չընկնեն երկրորդային սանկցիաների տակ։
Հավաստիացնելով, որ այդ ուղղությամբ նախարարության կատարած աշխատանքները տալիս է ճիշտ արդյունքներ՝ Քերոբյանը հավելեց. «Մի կողմից մենք կարողանում ենք ապահովել բարձր երկնիշ տնտեսական աճ, մյուս կողմից ապահովում ենք այն, որ ՀՀ-ի՝ որպես երկրի, բանկային և տնտեսական համակարգը որևէ երկրորդային հարվածների տակ չընկնի։ Մենք միաժամանակ նայում ենք մեր ԵԱՏՄ գործընկերներին, որովհետև իրենց նկատմամբ պարտավորությունները ևս պետք է ըստ պայմանագրային հարաբերությունների պահպանենք, և հանկարծ այնպես չստացվի, որ որոշակի դժվարություններ ստանանք նաև այդ ուղղությունից»։
