Չորս երկրներ Ստամբուլում փակել են իրենց հյուպատոսությունները
Ստամբուլում Մեծ Բրիտանիայի, Նիդեռլանդների, Ֆրանսիայի, Գերմանիայի հյուպատոսությունները դադարեցրել են այցելուների ընդունելությունը քաղաքի կենտրոնում ահաբեկչությունների սպառնալիքի պատճառով: Այս մասին հայտնում է «ՌԻԱ Նովոստին։
Գործակալության տեղեկություններով՝ Բեյօղլուի կենտրոնական շրջանում գտնվող Իստիքլալ հետիոտնային փողոցում գտնվող՝ Նիդեռլանդների գլխավոր հյուպատոսության ծառայությունները կմատուցվեն առցանց։
«Մեծ Բրիտանիայի գլխավոր հյուպատոսությունն այս պահին նախազգուշական նկատառումներով փակ է հանրության համար»,-ասված է բրիտանական դիվանագիտական առաքելության հաղորդագրության մեջ:
Փետրվարի 1-ին Գերմանիայի գլխավոր հյուպատոսությունն ընդհատել է իր աշխատանքը։ Վիզային և անձնագրային բոլոր հարցերը ժամանակավորապես դադարեցվել են։
Մինչ այդ Ամերիկայի Միացյալ Նահանգների դեսպանատունը երկուշաբթի՝ հունվարի 30-ին, նախազգուշացրել էր իր հայրենակիցներին Ստամբուլի կենտրոնում ահաբեկչությունների վտանգի մասին։ Դիվանագիտական առաքելության տեղեկատվության համաձայն առավել վտանգավոր կարող են լինել Ստամբուլի հետևյալ շրջանները ՝ Բեյօղլու, Գալաթա, Թաքսիմ, Իսթիքլալ փողոց։
