Հայերը շատ դժգոհ են. Ռուսաստանն առայժմ նախընտրում է սահմանափակվել քաղաքական մեթոդներով. ռուս փորձագետ
Հայաստանի և Ադրբեջանի միջև հակամարտությունը լուծելու ուղղությամբ Ռուսաստանի գործողությունները դեռևս բացառապես խաղաղ են։ Այս մասին «Ռեգնում» գործակալությանը հայտնել է Ռուսաստանի գիտությունների ակադեմիայի Պրիմակովի անվան Համաշխարհային տնտեսության և միջազգային հարաբերությունների ազգային գիտահետազոտական ինստիտուտի ավագ գիտաշխատող, Վարդգես Արծրունու անվան Սևծովյան-կասպյան տարածաշրջանի քաղաքական և սոցիալական հետազոտությունների ինստիտուտի տնօրեն Վիկտոր Նադեին Ռաևսկի:
«Ռուսաստանը բավականին արագ քայլեր ձեռնարկեց՝ դադարեցնելու ռազմական գործողությունները՝ դիմելով և՛ մի կողմին, և՛ մյուսին: Այո՛, հայերը շատ դժգոհ են, որ մենք հարաբերություններ ենք պահպանում ադրբեջանցիների հետ։ Սա պարզ է. նրանք ցանկանում են, որ Ռուսաստանը միանշանակ դիրքորոշում ընդունի բացառապես հայերին աջակցելու հարցում։ Բայց Ռուսաստանի հարաբերություններն Ադրբեջանի հետ, ընդհանուր առմամբ, միանգամայն նորմալ և գործընկերային են, և, բացի այդ, Ադրբեջանի գործողությունները կապված են Թուրքիայի դիրքորոշման հետ, որը ադրբեջանական ցանկացած խախտման դեպքում միշտ լինելու է բացառապես Ադրբեջանի կողմից։
Այնուամենայնիվ, Ռուսաստանը կատարեց այն քայլերը, որոնք, ի թիվս այլ բաների, իրենից պահանջվում էին Հայաստանի հետ պայմանագրով։ Մոսկվան անմիջապես պահանջել է դադարեցնել կրակը, դադարեցնել ցանկացած հարձակում և, համապատասխանաբար, զորքերը դուրս բերել նախկինում զբաղեցրած տարածքներ։ Սկզբունքորեն հնարավոր է ադրբեջանական հարձակումները կասեցնել քաղաքական մեթոդներով, իսկ անհրաժեշտության դեպքում՝ ռազմական միջոցներով ազդելով Բաքվի վրա։ Բայց Ռուսաստանը, իհարկե, առայժմ նախընտրում է սահմանափակվել քաղաքական մեթոդներով և դադարեցնել ադրբեջանական այս հարձակումը, դադարեցնել հարձակումները խաղաղ բնակավայրերի վրա», – ասել է փորձագետը։
Աղբյուրը՝ tert.am
Հիշեցնենք՝ սեպտեմբերի 13-ի կեսգիշերից Ադրբեջանի ԶՈՒ ստորաբաժանումները հրետանային միջոցների, ականանետերի, ԱԹՍ-ների, խոշոր տրամաչափի հրաձգային զինատեսակների կիրառմամբ ինտենսիվ կրակ են բացել հայ-ադրբեջանական սահմանի միանգամից մի քանի հատվածում տեղակայված հայկական դիրքերի ուղղությամբ, մասնավորապես հրետակոծման են ենթարկվել Սոթքի, Ջերմուկի, Վարդենիսի, Գորիսի, Կապանի, Արտանիշի և Իշխանասարի ուղղությամբ տեղակայված դիրքերը ու սահմանամերձ բնակավայրերը, հարվածներ են հասցվել նաև քաղաքացիական ենթակառուցվածքներին։
Սեպտեմբերի 14-ի երեկոյան Անվտանգության խորհրդի քարտուղար Արմեն Գրիգորյանը հայտնել է, որ միջազգային հանրության ներգրավվածության շնորհիվ հաջողվել է ձեռք բերել հրադադարի պայմանավորվածություն։
Սեպտեմբերի 16-ին Նիկոլ Փաշինյանը հայտարարել է, որ զոհերի ճշգրտված թիվը 135 է, սակայն այն վերջնական չէ։
Մինչ այժմ պաշտպանության նախարարությունը զոհվածների անունները չի հրապարակել։
