Բայդենը զանգահարել է Մակրոնին՝ Ֆրանսիայի ղեկավարի՝ Ռուսաստան և Ուկրաինա կատարած այցից հետո
ԱՄՆ նախագահ Ջո Բայդենը հեռախոսազրույց է ունեցել Ֆրանսիայի նախագահ Էմանուել Մակրոնի հետ Ֆրանսիայի ղեկավարի՝ Ռուսաստան և Ուկրաինա կատարած այցից հետո, հայտնել է Սպիտակ տան մամուլի քարտուղար Ջեն Փսակին։ Գրում է interfax.ru-ն:
«Նախագահն այսօր առավոտյան խոսել է նախագահ Մակրոնի հետ»,- ասել է Փսակին Սպիտակ տան մամուլի ասուլիսի ժամանակ։
Նա նշել է, որ այս շաբաթվա ընթացքում պետք է սպասել նախագահի և եվրոպացի գործընկերների այլ զրույցների։
Ավելի ուշ Սպիտակ տունը մամուլի հաղորդագրություն է տարածել, որում նշվում է, որ Ֆրանսիայի և ԱՄՆ-ի առաջնորդները «քննարկել են նախագահ Մակրոնի վերջին բանակցությունները Ռուսաստանում և Ուկրաինայում»։
«Նրանք նաև քննարկել են շարունակական դիվանագիտական ջանքերը և զսպման միջոցները, որոնք ձեռնարկվել են դաշնակիցների և գործընկերների հետ սերտ համակարգմամբ՝ ի պատասխան Ռուսաստանի կողմից Ուկրաինայի սահմանին ուժերի շարունակական կուտակման»,- ասվում է փաստաթղթում:
Փետրվարի 7-ին Ֆրանսիայի նախագահ Մակրոնը Մոսկվայում հանդիպել է նախագահ Պուտինին։ Նրանց բանակցությունները տևել են ավելի քան հինգ ժամ։ Ուկրաինայի շուրջ դեէսկալացիան Ֆրանսիայի նախագահի այցի կենտրոնական թեման էր։
Հաջորդ օրը Մակրոնը Կիևում բանակցություններ է վարել Ուկրաինայի նախագահ Վլադիմիր Զելենսկու հետ։