Դատարանն արգելել է Վանաձորի համայնքապետ ընտրելու հարցով ավագանու նիստեր հրավիրել
Դատարանում քննվող վարչական գործի շրջանակներում դատարանի կողմից այսօր՝ դեկտեմբերի 24-ին կիրառվել է հայցի ապահովման միջոց, որով մասնավորապես արգելվել է Վանաձոր խոշորացված համայնքի ղեկավար ընտրելու հարցի քննարկման նպատակով ավագանու նիստերի կազմակերպմանն ու անցկացմանն ուղղված որևէ գործողության կատարումը` մինչ վերաքննիչ վարչական դատարան ներկայացված վերաքննիչ բողոքի ընդունելության հարցի լուծումը։ Այս մասին տեղեկանում է «Լուսավոր Հայաստան» կուսակցության տարածած հայտարարությունից:
«Մինչդեռ, Վանաձորի համայնքապետարանում, չսպասելով ընտրական վեճի արդյունքներին, ավագանու նիստ են փորձում գումարել, ինչն անթույլատրելի և անօրինական է` ըստ վերը նշված որոշման»,-ասված է հաղորդագրության մեջ:
«Լուսավոր Հայաստանը» Վանաձորի ընտրությունների հետ կապված դիմել էր դատարան՝ պահանջելով անվավեր ճանաչել ընտրության արդյունքների մասին ընտրական հանձնաժողովի որոշումը:
Այսօր՝ դեկտեմբերի 24-ին նախատեսված էր Վանաձորի նորընտիր ավագանու անդրանիկ նիստը, որը սակայն չկայացավ:
