Եթե Իրանը ստիպված լինի միջամտել, ապա կազատագրվի ոչ միայն Հայաստանի հարավը, այլև այլ շրջաններ. իրանական Farhikhtegan
Իրանական «Ազադ» իսլամական համալսարանին պատկանող Farhikhtegan օրաթերթը հոդված է հրապարակել Կովկասում տեղի ունեցող իրադարձությունների վերաբերյալ, որում ընդգծված է.
– Հայաստանի հարավային շրջանի օկուպացիան և Թուրքիա-Ադրբեջան ցամաքային հաղորդակցության հաստատումը նոր մեծ խաղ սկիզբ կդառնա:
– Թուրքիան Վաշինգտոնի և Թել Ավիվի աջակցությամբ փորձում է վերահսկողություն հաստատել տարածաշրջանի հաղորդակցության ուղիների վրա:
– Աֆղանստանը լքելուց հետո Վաշինգտոնը փորձում է Թուրքիայի միջոցով վերադառնալ տարածաշրջան:
– Իրանը տարածաշրջանում ԱՄՆ գործողությունների թիրախն է: Ղարաբաղյան ճգնաժամի պայմաններում ԱՄՆ-ի նպատակը, մասնավորապես, Իրանին վնաս հասցնելն է:
– Իրանի հյուսիսարևմտյան հատվածում հրահրել անջատողական սադրանքներ:
– Իրանին զրկել Կովկաս մուտք գործելուց`Հայաստանի հարավային շրջաների օկուպացիայի միջոցով:
– Ստեղծել ճգնաժամային իրավիճակ Իրանի սահմաններին:
Հոդվածում նշվում է, որ Թուրքիայի և Ադրբեջանի առաջխաղացումը դեպի Իրանի սահմաններ կարող է ճգնաժամ առաջացնել Իրանի և այս երկրների հարաբերություններում: Ընդգծվում է, որ Կովկասում խնդիրների առաջ կանգնած Իրանը Ռուսաստանի աջակցությամբ կփորձի ճնշում գործադրել Թուրքիայի նկատմամբ Սիրիայում և Իրաքում: Ռազմական տեխնիկայի կուտակումը երկրի հյուսիսարևմտյան սահմաններին ցույց է տալիս, որ Իրանը լրջորեն տրամադրված է կանխելու տարածաշրջանում աշխարհաքաղաքական փոփոխությունները և Հայաստանի հարավային շրջանների օկուպացիան:
«Եթե Իրանը ստիպված լինի միջամտել, ապա կազատագրվի ոչ միայն Հայաստանի հարավը, այլև այլ շրջաններ»,- ասվում է հոդվածում: