Աֆղանստանի նախագահը հրաժարական է տվել
Աֆղանստանի նախագահ Աշրաֆ Գանին հրաժարական է տվել, հայտնում է Sputnik-ի աֆղանական ծառայությունը ՝ վկայակոչելով տեղի աղբյուրները։ Պաշտոնապես այդ տեղեկությունը դեռ չի հաստատվել։
Ավելի վաղ «Ալ Արաբիա» հեռուստաալիքը հաղորդել էր, որ «Թալիբան» շարժման զինյալների պատվիրակությունը ժամանել է Քաբուլի նախագահական պալատ՝ կառավարության հետ բանակցություններ վարելու։
Ինչպես հաղորդել է Al Arabiya-ն, Աֆղանստանի նախագահն առաջիկա ժամերին վայր կդնի իր լիազորությունները։
Ավելի վաղ տեղեկացրել էինք, «Թալիբան» արմատական շարժման կազմավորումները կիրակի հարձակում են սկսել Քաբուլի վրա։
Ինչպես Twitter-ում հայտարարել է թալիբների պաշտոնական ներկայացուցիչ Զաբիհուլլա Մուջահիդը, շարժումն իր ստորաբաժանումներին հրաման է տվել չգրոհել Քաբուլը:
«Թալիբան» շարժման զինյալների կողմից երկրի խոշոր քաղաքների վրա հարձակման հետևանքով Աֆղանստանում իրավիճակը վերջին շաբաթներին սրվել է: Կիրակի ԶԼՄ-ները և աղբյուրները հայտնել են, որ թալիբները վերահսկում են Աֆղանստանի բոլոր սահմանային անցակետերը, գտնվում են մայրաքաղաքի մերձակայքում և հսկողության տակ են վերցրել Քաբուլի համալսարանը: Մինչդեռ Աֆղանստանի նախագահի վարչակազմը հայտարարել է, որ վերահսկում է իրավիճակը երկրի մայրաքաղաքում:
Ընդ որում, Աֆղանստանի առաջնորդի վարչակազմը հայտարարել է, որ իրավիճակը վերահսկողության տակ է պահում։
Թալիբներն ավելի ուշ հայտարարել են, որ մտադիր չեն վրեժխնդիր լինել, և Քաբուլում բոլոր պաշտոնյաները կգտնվեն անվտանգության մեջ։
Աֆղանստանի ներքին գործերի նախարարի պաշտոնակատար Աբդուլ Սաթար Միրզաքվալը լրագրողներին հայտնել է, որ իշխանության փոխանցումը տեղի կունենա խաղաղ ճանապարհով:
«Ալ Արաբիա» հեռուստաալիքը հայտնել է, որ ներքին գործերի նախկին նախարար Ահմադ Ջալալին ստանձնել է Աֆղանստանում անցումային իշխանության ղեկավարի պարտականությունները:
